Resubelpara, March 6, 2022: North Garo Hills a•jao donggipa Rari bajar-oni km 4 mang chel•ao donggipa Remgre songni manderang ringani china bang•a neng•nikanirangko man•enga ine u•iataha.
Songni manderang changni chang PHE department-na u•iatahaoba department-ni galchipaniko aro nachil songgijaniko man•ahani gimin Remgre songni manderang NAS-na badi ka•e lekka seatskaha.
“Chinga Remgre songni manderangni lekka seatako man•soe, uamangko grongna re•angaha. Remgre song jatchiko Rem chiring dilsa gnang aro ia chon•begipa chiringo songni manderang na•tok na•batrangko rippingna warirangko kangachim, indiba PHE department ia chiringo dam ba banrangko gadangni gadang dake kachangahani a•sel chirang tipengaha. Uni gisepon sorkari chiring chibisikrangko rippingna aro chiringo na•tok na•batrangko tange rakkina nanga ine na•tokrangko jilchina ge•etaniko on•genchimoba sorkarian niamko pe•e chiringni jokbaenggipa ramako dam kachangaha. Ua songo donggipa chiringni kosako dam kachanganichi ka•maona jokbagipa chiringrang namen chonbea. Indake ka•mao dongenggipa na•tok na•batrang gimaroroenga aro samtangtango donggipa ma•manti sam bolrangni chi man•jae sianganiko nikna gita man•a.Una agreba songni nokni manderang china neng•nikanirangko man•enga.Ia obostarangni bidingo North Garo Hills a•jani PHE department nirok sandina nanga aro biaprangko nigrikesa kamrangko ka•na nanga” ine NAS-ni President Tengrak Marak u•iataha.
Remgre songni manderangna PHE department pipe-rangko sale on•gija ua jolni chiringko dam kachange gipin biaprangona chirangko ra•angskaenga, department Remgre songko galchanganiara kraani ong•ja. NGH a•jani PHE Department-ko mol•molatengon, sorkarini development-ko darangba jegalja, indiba chiring chibisikrangko dam kachange uano pangchake janggi tangenggipa chini jonturang aro songni nokni manderangna neng•nikaniko ra•bana nangja ine NAS mikgrakatangaha.