Jan 28, Shillong: Garo Hills Autonomous District Council (GHADC)-o National People’s Party (NPP)-chi dilenggipa Executive Committee (EC)-rang adita meligrikgijanirang ong•engon, MDA sorkari a•bachengonin District Council-oni chel•e dongaha aro ia changoba sorkari maming jak on•ani dongjawa ine a•dokni Skotong Minister Conrad Sangma Sukrobar salo parakataha.
GHADC-ko Benedic R Marak-ni dilanio kusi ong•jae adita sak MDC-rang, EC-oni ong•katahani gimin NPP-chi dilenggipa EC-ni bilko tosusana gita Sonibar salo dingtangmancha session-ko ong•atenga.
Indake ong•engon, a•bachengonin MDA sorkari, District Council-ni kamrango jak on•na jechakaha aro da•oba sorkari maming jak on•paani dongjawa ine Conrad Sangma talatangaha. GHADC-o ong•enggipa obostarang niam gita ong•aichina ineba Sangma janapatkuaha.
NPP-chi dilenggipa sak 9 Executive Membor (EM)-rang kam watani bidingo Chairman aro dingtang dingtang membor-rangoniko koborko man•soaha aro special session-ko ong•ata baksa CEM-ni kosako No Confidence Motion-ko ong•atna am•engani bidingoba koborko man•soaha ine Skotong Minister parakataha.
GHADC-ni CEM Benedic R Marak, warachakenggipa Trinamool Congress (TMC) dol baksa bakrimangengani gimin uko kam ra•galchina dabie sak 9 MDC-rang EC-oni ong•katgrimtokaha.
Indake NPP-ni EC-o bakrimenggipa bang•bata MDC-rangan CEM-ni kosako chakattokaha indiba CEM kamtangko watna jechakengachim. Adita salrangna skang kamtangtangko watanggipa Chairman-rangni kamoba CEM Trinamool Congress (TMC)-ni sak 3 MDC-rangko Chairman on•skaaha.
Indakgipa obostarang GHADC-o ong•angani ja•man, Executive Committee-ni bilko tosusana gita Sonibar salo Special Session-ko ong•atchina Meghalaya a•dokni Governor Satyapal Malik ge•etaniko on•ataha.