28 Jan 2022, Baghmara: South Garo Hills a•jani ning•o donggipa Rongara jolni Bank Demand Committee-dol, Nokmarang, Giljani dilgiparang aro Rongara Bajar Managing Committee Budbar salo a•jatangni Deputy Commissioner, F.M.Dopth-ko grongenba Rongara-o 2005 bilsioni galchipe donenggipa State Bank of India (SBI)-ko kulie on•piltaichina mol•molangaha.
“Ia Bank-ko batanggipa 2005 bilsioni galchipe donengani a•sel Rongara aro uni wilwilao songdongenggipa manderang tangka paisarangko okna ba chipna nangani bidingo bang•a neng•nikanirangko man•tokenga. Chinga Bank-o dakna nanggni kamrangko chu•sokatna km 62 mang chel•gipa ramarangko gari para bon•ne re•na dona nangenga. Bang•a budepa buchumarang an•tangni tangkarangko okna inditan chel•begipa ramarangko re•bana gita nanga aro ramarang namjani a•selo bang•a changon neng•nikanirangko chagronga. Salantina hajira kam ka•e cha•enggiparang an•tangni man•a tangka paisarangko chipe donna mangmangba chel•achi re•angna nanggenchim ong•ode, nokdangko alduna chamgimin tangka paisarangko re•a doanion galpilna nangaia.
Rongara songo CNRD Block, Police Station, Post office aro a•kingni ning•o nok ban ba songnok-o mande chu•onga gita jela jeo pangchake chingni songni namgnina aro manderangni neng•nikanirangko komiatna State Bank-ko dabiani maming gualani dongja. Gimik neng•nikanirangko seokako man•gipa Siju-Rongarani membor-ba nikengnaba gnang aro chingni dabianiko knachakgenchimode re•baenggipa sal somoina, Rongarani manderangna dakchakani aro ka•dongani nabagen. Chinga chingni nengnikanirango pangchake ramako mesoke on•agitasan ong•aia una agre chingni dabienggipa Rongarana State Bank-ko kulipiltae on•ani bilde Baghmara, South Garo Hills a•jani ning•o SBI-ko nirokenggipa Managing Director ba Branch Manager aro Headquater oni Bank-ko chalaigipa aro nirokgipani jak-o pangchaka. Rongara State Bank-ko adita bilsirangna galchipe donaha aro ia bank-ko a•bachengatna gita songni manderangan bank-na building nokrangko rikna a•atangko on•na miksongenga, jedakode re•baenggipa salrango uamang maming neng•nika gri tangka paisarangko chipna aro okna gita man•gen” ine Calis Momin u•iataha.
Meghalaya a•dokko man•aoni bilsi 50 gappilaha, indiba da•ona kingkingba headquarter-oni chel•bea songrango songdongenggipa manderang ramarang, skulrang, network-rang, bank-rang aro dingtang dingtang kamrango galchipako man•ne neng•nikanirangko man•na nangengkua ineba janapataha.
South Garo Hills a•jani Deputy Commissioner uamangni mol•molaniko ta•raken bimang pil•atgen ine uamangna ku•rachakataha.