Tura, April 27, 2023: Garo Students’ Union (GSU), Dadenggre, Dadenggre C&RD Block-ni MCS Officer-ko gipin biapchi kam ra•jitangani gimin suk ong•gijanilo parakataha.
“Tribal MCS Officer jekon, re•anggipa 2022 bilsini May 12 tariko Dadenggre C&RD-ni BDO ong•e watataha. Je officer-an songni nokni manderangna ka•sae dangdike on•na miksongengachim, uandakgipa officer-rangko pangnan bilsi 1 gapgipjan, kam ra•jitangronga.Uamangko komibeoba bilsi 2-rangna kamo donna nanga. Kamtangko name ma•sigipa ong•oba, kamko ka•na somoi nanga” ine GSU Western Zone Dadenggre-ni President, Tengsan M Marak parakataha.
IAS Officer saksako Dadenggre Block-ona BDO ong•e watataha, indiba jasa gapgijan uko kam ra•jitangaha, indakgipa sorkarini kamara manderangni ra•chakna man•gijani ong•a. Uni gimin pangkamgipa MCS Officer-ko Dadenggre C&RD Block-o nanga ine GSU dabiangaha.
“Chinga A•chik Ku•sikko ba ku•siktangko aganna aganna aro manderangni neng•nikaniko ma•sigipa MCS Officer-kosa Dadenggre C&RD Block-o nanga ine GSU dabiangaha. Garo Hills-ni bang•a MCS Officer-rang dingtang dingtang department-rango kam ka•enga. Dadenggre jolo janggi tangenggipa manderangko niatgenchimode, bang•bata manderangan game cha•giparangsa ong•a. Uni gimin, chinga manderangni neng•nikaniko ma•sia, block office-chi kam nangana re•ango officer A•chik ku•sikko aganna man•jaode, songni manderangna neng-•nikani ong•a. Uni gimin songni manderangna ka•sagipa aro gisilo nange dangdike on•nagipa MCS Officer-kosa Dadenggre block-ona watatna nanga” ine GSU dabiangaha.