Tura, April 23, 2023:West Garo Hills a•jao donggipa, Raksamgre elakkani ning•o ga•akgipa Gindopara, Renchagre aro Direkgre songrango bang•a bolrangko cha•ue, songsul Assam a•dokona palsrukatenga ine songni manderang social media-rango parakataha.
Uasan ong•aigija Garo Hills-ni dingtang dingtang songrangon, bang•a bol wa•arangko cha•ue, gipin a•dokchina palsrukatengani a•sel, Garo Hills-o namen neng•nikaniko chagrongengaha ine nikna gita man•a.
Ia nina nitogipa a•brirang, ka•sinjrimjrim balsrisri rona rotogipa biaprang, simdimdim tangsekgilgil buring bolgrimrang, nitogipa chi-ontim chidarerang, matburingrang aro do•o-matrangan gapgipa Garo Hills-ko dingtangmancha Nokgipa Isol an•chingna pattiaha. Indiba manderangni ka•sagija buringni bol-wa•arangko nosto ka•ani a•sel da•ororo mai obosta ong•enga nikna man•aha.
Buringo bol-wa•arang dongjani a•sel chiring chibisikrang tipengjok, salni ding•anirang batroroengjok. Iani gimin A•chik jat sakantian chanchiengama? Gisik gnanggipa manderang duk ong•a, gisik gri manderang jakpa doke kusi ong•a, uni gimin mikkangchina simsakanide, an•ching sakantini jako ong•a. Ong•jaode, da•ona bate gadang 10 batgen. Rev. Tangkan-ni agansogimin, “Garo Hills Damgipin A•gisi” da•o ong•bebe-engjok.
Uni gimin, hai an•ching sakantian, Nokma Chrarang aro songni manderang apsan ku•monge, an•chingni nitogipa A•chik a•songko gimaatgija tange aro name ripingangna ja•ku de•angna. Jedakode, gimagimin aro bon•anggimin, bol-wa•arangko skang gita apsan ong•atpilna kang•kare kana ine u•igipa, ma•sigipa manderang ku•mongataha.