Williamnagar, April 20, 2023: A•chik Organization for Social Welfare (AOSW) Simsanggre, East Garo Hills a•jani Deputy Commissioner-na lekka sedoate songo noko donggipa manderangni neng•nikanirangko janapataha.
AOSW-ni parakatani gitade, a•jani bang•a manderang Birth Certificate aro Death Certificate-rangko tarina re•angon, DC office-o kam ka•giparang, songni manderangna neng•nikanirangko on•enga ine parakataha.
Williamnagar DC Office-ni kuturi nombor 11-o kam ka•enggipa me•chik saksa, kam nangana re•anggipa manderangko pangnan gisik saani kattarangko aganne watatronga aro songni manderangko mikchepe ka•sagija jakkala. Songni manderang an•tangni nanga lekkarangko ba document-rangko ra•na ba gapatgimin form-rangko on•na re•angon, llekkarangko ra•chaksogipa me•chik ka•sina kattachi aganrongja, batesa manenge watronga. Songni manderang chel•bea biaprangoni re•bae, an•tangtangni birth certificate, caste certificate-rangko ra•na aro tarina re•angoba, office-o kam ka•enggipa manderangni kal•stekako man•ne suk ong•gijaniko parakronga. Certificate tarina re•anggipa manderang sena jotna changjae, dakchakaniko bi•oba maming dakchakaniko on•rongja. DC Office-o manderangni certificate-ko ra•chaktimna aro certificate-rangko on•timna mangmang kamo rakkija. Indiba manderangni u•igijagipa aro changgijagipa kamrango dakchakchinasa rakkia. Office-o kam ka•enggipa manderang uarangko gisiko ma•sija, “Service”-ni kattara synonym ba “Servant” ong•a, jeko agangenchimode, mandeskana dangdike on•ani ong•a, ine AOSW-ni General Secretary Premiar Sangma u•iataha.
Minggipin neng•nikaniara Birth Certificate-rang chu•ongjani a•selba ong•a. East Garo Hills a•jao Registration Office ge•sa mangmangsan donga, uan DC Office-o ong•a. East Garo Hills a•jao manderang lak 4-na bate donga. Bang•a songni manderang tangka paisa bon•ne, birth certificate-ko tarina Williamnagar DC Office-ona re•baenga. Indiba birth certificate-rangko tarina re•anggipa manderang poraia skia dongpajae, birth certificate-ni form-ko gapatmiting somoio, segualanirang donga. Indiba DC Office-o pangnan, Birth Certificate form-rang bon•changronga. Iani a•sel songni manderang kam matchotgija noktangchi re•angpilna nanga aro changni chang re•na dona nangao ga•akenga ineba parakataha.
Unbaksana, Rongjeng jolo dongenggipa manderang birth certificate tarina Pulis Verification-ko nanga ine aganronga. Rongjeng jolo dongenggipa manderang mangmangsan, birth certificate-ko tarina pulis verification-ko nanga ine agananiara kraani ong•ja aro neng•e re•baenggipa manderangna sinjetaniko on•ani ong•a. Rongjeng, East Garo Hills a•jani ning•o ga•aka, indiba uamangko a•jatangni mande gita jakkalgija pulis verification-ko sandie neng•nikataniko on•ronga. Gipin songni manderangoniko pulis verification sandigija Rongjeng-ni manderangkosan pulis verification sandianiara kraja aro ra•chakna amgijani ong•a.
“An•ching Sixth Schedule-ni ning•o donggipa manderang ong•a, uni gimin an•chingni A•king goreko nirokgipa, A•king Nokma donga. A•king Nokma-ni see on•gipa, NOC donggenchimode, gipin document-rangko nangja. Uni gimin Pulis Verification-ko on•chapna nangani dongja, chinga iako raken jegala” ineba Premiar Sangma janapataha.
Uni gimin, “Chinga AOSW-ni dilgiparang songo dongenggipa manderangni neng•nikanirangko nike, uamangni kamrangko altuatna, DC Office-o kam ka•enggipa manderangni kamko nirok sandichina mol•molatna sika” ineba didiataha.