Baghmara, Mar 28, 2023: GSU Kapasipara Unit, Sombar salo Kapasipara-o donggipa Animal Husbandry & Veterinary Department-ni Stockman Centre ICDP-ko re•ange nieaha.
GSU-ni re•ange nianio Kapasipara Stockman Centre-ni Assistant Field Worker, Salgam Ch.Marak kamtangko tik ong•e ka•ja ine nikna gita man•aha.
GSU-ni u•iata gitade, Salgam Ch Marak 9-Mile songoni ong•achim. Ua 2021 bilsio Kapasipara Veterinary Department-ni Assistant Field Worker ong•e kamko ka•chengaha. Salgam Marak, kam ka•chengaonin sal 3-rangsan Office-ona re•baha ine parakataha.
Kapasipara Stockman Centre-ara Telekari songoni Dimpilipara songona man•a, inditan area dal•achim. Uni gisepon bang•a songni manderang dingtang dingtang jila kaanirangko dakengon, basakobade jila kaanirang saa ding•anirangko man•a, ua somoio Veterinary office-ona re•ange, samrangko ra•na aro biji su•na nangode, pangnan Assistant Field Worker-ko man•rongja ine u•iataha.
Assistant Field Worker Office-o dongkame, kamko ka•jani a•sel manderang an•tangtangni jilanirangko gimaataona soka. Uni gimin, “Chinga GSU Kapasipara Unit, gital Assistant Field Worker-ko ta•rake watatchina, South Garo Hills a•jani District AH & Veterinary Department-ko dabienga. Salgam Ch Marak kamtangona re•bagija, jila kaanirangko gimaatani gimin, uni kosako raka ja•kuko de•na nanga” ine GSU badi ka•an baksa dabiangaha.
Indake ong•engon, “Chingni dabianiko knachakja ong•ode, mikkangchi rakbata ja•kurangko de•anggen” ine GSU Kapasipara Unit parakataha.