Wiliamnagar, Feb 19, 2023:NPP National President aro Skotong Minister Pa Conrad K.Sangma Sonibar salo Songsak-ni NPP candidate Nihim D.Shira-na campaign ka•eaha.
Pa Sangma tom•anio jinmana aganengon, “Re•baenggipa Fenruary 27 tarikna skangan hai an•ching sakantian ku•mongna. Nihim D.Shira Songsak-o atchigipa na•simangni depante ong•a. Ua maming saloba na•simangko gale katjawa aro gipin bisapchi re•ange chakatjawa. Ia eleksino an•ching namgipa dilgipako seokna, jedakode Songsak jolrangko name develop ka•na man•gen. Hai an•ching ia miksonganio kam ka•na anga na•simangko mol•molna sika. Dr Mukul Sangma-ko da•alo Tikrikilla-ni manderang jegalenga, maina Tikrikilla-ni manderangba kensoenga. Chinga una vote-rangko on•oba, ambino gale katode mai ong•gen ine jajrengsoenga. Uni gimin, da•alo Dr Mukul Sangma-ni field-rang Tikrikilla-o namjaenga, apsandaken Songsak-oba bang•a jolrangon namjaenga” ine Conrad Sangma aganangaha.
Ampati-ni manderang Dr Mukul Sangma-ni kamna suk ong•jae kattokenga, “Da•alo TMC-ni manderang Ampati-o brangenga. Uni gimin Ampati-ni manderang TMC-oni ong•kate, NPP party-na chakenga, na•simang Ampati jolani manderangchi kobor ra•e nibo. Apsandke Songsak joloba neng•nikaniko man•gen. Da•alo je manderangan Dr Mukul Sangma-na vote-rangko on•na aro kam ka•na chanchiengachim, simsakbo, na•simangba branggen. Dr Mukul Sangma Songsak-ko wate katode, na•simangko sawa nirokgen gale katgnok, uni gimin simsakna nanggen. Jedake ua Ampati-ni manderangko gale kata, apsandake Songsak-ni manderangkoba gale katgen ine NPP padot aganangaha.
“Songsak-ni manderangni palo Nihim D.Shira angni Office-ona re•bae, Songsak jolo mai mai development-rangko nangenga dorgasto-rangko ra•bae, pilak kamrangko ka•aha. Songsak jolo je ramarangko man•bahachim, ian Songsak MLA-ni a•sel ong•ja, na•simangni gitcham MLA aro mikkangchi MLA ong•nagipa, Nihim D.Shira-ni krenge kam ka•ani a•selsa dingtang dingtang ramarangna sanction ka•na man•aha” ineba Pa Sangma aganangkuaha.
“Chingni wak bi•sarang aro do•orangko sualani somoio dingtang dingtang program-rangko ong•ate kamrangko ka•aha. Uni gisepon, dingtang dingtang elakkani MLA-rang angona re•bae, chingni joloba iarangko dakpabo ine angko mol•molaha” ine Conrad Sangma aganaha.
Ua somoio Dr Mukul Sangma dingtang dingtang scheme-rangko ra•bana cholko man•achim. Da•o NPP sorkari Focus aro Focus+ ko on•ani giminsa, TMC aro Dr Mukul Sangma, WE Card-ko bikotaha. Ia WE Card-de “Bakki Card” -sa, tangka man•jawa, ambino TMC maiba ka•e sorkariko rikna man•osa, ia tangkarangko man•gen. Uni gimin manderang u•ia, sorkariko rikna komioba sak 31 MLA-rangko nanga. TMC maming saloba sak 31 MLA-rangko man•jawa ineba aganangaha.
“Hajalni hajal manderang Focus aro Focus+ ni tangkarangko man•aha aro ia jolni bang•a ma•gipa pagiparang
Focus aro Focus+ ni tangkarangko man•enggen. MDA sorkari Meghalaya a•dok gimikon lak 3 nokdangrangna Focus aro Focus+ ni tangkarangko on•aha. Uni gimin mikkangchiba, ia program-ko ka•angkugen aro ia Focus program-ko bilsiantian ong•anggen. Indake bilsiantian nokdang ge•prakna group-ni account-o 5000 aro personal account-o 5000, chu•gimik 10000-ko chipatgen. Uni gimin, hai ku•mongna, ia namgipa party aro namgipa sorkari, je sorkarian aro party-an kangal cholgri nokdangrangna chanchie kam ka•engani gimin NPP party-na dakchakchina aro bilko on•taichina Conrad Sangma sakantikon mol•molangaha.