Tura, Feb 15, 2023: AITC-ni National General Secretary Abishek Banerjee Tura-ona re•bae, South Tura aro North Tura-ni TMC candidate Richard M.Marak aro Rupert M.Sangma-na campaign ka•e dal•begipa rally-ko Butbar salo ong•atangaha.
Ia rally-o National General Secretary Abishek Banerjee baksa Meghalaya TMC Incharge Dr Manash Bhunia, TMC Legislature Party-ni dilgipa Dr Mukul Sangma, Chokpot-ni TMC candidate Lazarus M.Sangma, South Tura-ni TMC candidate Richard M.Marak, North Tura-ni TMC candidate Rupert M.Sangma, TMC State Mahila-ni President Selma D.Shira, West Garo Hills District Cordinator Sapford N.Sangma, TMC State General Secretary Mukul Das, TMC State level, District level aro block-ni dilgiparang aro bang•a hajalni hajal manderang kusi ong•e bakko ra•angaha. Ia rally-ko Hawakhana petrol pump-oni a•bachenge Tura main bajar-ona jinma ja•achi re•jomangaha aro tom•aniko ong•ate TMC candidate-rangna vote-rangko on•china Abishek Banerjee tom•bagipa sakantikon mol•molangaha.
Abishek Banerjee, jinmana aganengon, “Anga na•simangni ku•monganiko nike namen kusi ong•a aro na•simangna angni an•chikoba on•chakgen. Anga na•simangna ku•chakenga, ching baksa ong•bo, TMC na•simang baksa ong•gen aro na•simangna chadenga, jedakode a•doko corruption-ko ra•bagipa NPP sorkariko dakgrike amna man•gen. TMC da•alo namgijagipa sorkariko gimaatna re•chakatenga aro membership drive-ko a•bachengatenga. Indaken lak 4 ba lak 5 member-rang TMC-o bakrimaha. An•ching apsan ku•monge TMC sorkariko rikani somoi ong•engjok.Uni gimin re•baenggipa February 27 tariko lekka pu•ongen aro iani result-ko March 2 tariko parakatgen. Uni gimin na•simang sakantian Meghalaya a•doko dingtanganiko ra•bana samsi bibalni noksao sekdepe TMC-na vote-ko on•pabo” ine Abishek didiangaha.
Apsandake, Dr Mukul Sangma-ba jinmana aganprakengon, District Council-ko sichipatna am•engjok NPP dolni manderang. Bilsi 3 ong•jok district council-o kam ka•giparang dormaha man•gija. MDA sorkari Skul aro Kolej-rango poraienggipa chartro chatrirangna cholarship on•na man•jajok.Man•ne cha•giparangna schorlarship gamchatjaoba, kangal bi•sarangna Scholarshipa gamchata kangalrang bang•a. Uni giminsa iarangko ku•chakenga. Mija Songsak-o meeting ka•e Onrad Sangma, iarang gimikan bakki card ine aganaha, Ia chingni agangipa bakki card ong•ja, iade ku•chakenga, manderangna ka•sae kam ka•gen. Duk mikchi ong•e nokdang ba•ku dakna neng•nikenggipa ma•giparangna tangka on•atgen japrako 1000, bilsio 12,000, bilsi 5-o 60,000-ko man•gen. Indita lakni lak me•chikmarang nokdang dakanio neng•nikaniko man•enga. Chadamberangna bilsi 21-oni 40-ona dakchakaniko on•gen. Ia bilsi 40-ko maina bariatenga, service-na ma•ringe donggiparang bilsi badeangjok, uni gimin bilsiko 40-ona bariatjok. Unbaksana buchuma budepa, segri-randirang, ja•kora jakkorarangna skango 500 ka•e on•achim, uko bariatna tik ka•e, japrako 1000 prak, iarang gimikko dakna kror 2000 mang nanggen.
Election mittingon gimik political party-rang ku•chakna nanga, a•songni manderangna maiko dakgen. A•songni manderangna dingtangmancha development-ni rengsirangko sokatan baksa maidakgipa niamrangko tarie state-ko re•dilgen. Manderangni nangan salo maidake warachakgen, niamchi, kattachi, ku•rangchi sorkarini gita warachakgen. Iarang gimikko kam ka•na electiono ku•chakna nanga ine Dr Sangma aganangaha.