Shillong, Feb 9, 2023: Re•anggipa Monggolbar walo Phulbari elakkani ning•o donggipa Charbatapara songo dolgni political dolrang doltangtangna chakgrike dakgrik dinggrike so•sojengjeng ong•anina, election-ni somoio indakgipa a•selrangko ong•atjachina NPP didiataha.
Re•baenggipa February 27 tariko ong•atenggipa Meghalaya Assembly election-o maming nangchakeani dongjachina, Budbar salo NPP, District Administration (DA)-ko didiatenba, West Bengal a•doko ong•ronga gita Meghalaya a•doko so•sojengjeng ong•e election-ko ong•atjachina didiataha.
Meghalaya Assembly ni gitcham Speaker aro Phulbari elakkani NPP candidate AT Mondal-ni parakatani gitade, Mongolbar walo ong•anggipa a•selara badiaba dolni miksongmanchae kajia a•botani a•selsa ong•aha ine parakataha.
“Meghalaya a•dokosan ong•aigija, India a•song gimikon maming so•sojengjeng ong•ani gri election-ko ong•atna nanga. Chinga so•sojengjeng ong•ani gri tom•tome election ong•aniko nangnika. Indiba ia a•sel ong•aniara badiaba dolni manderang miksongmanchae kajia a•botasa ong•a” ine Mondal parakataha.
Ia a•sel ong•anio NPP-ni manderangde tom•tomesa re•jomangengachim, indiba TMC-ni manderangsa chadrapchengaha, ine janapatenba ia a•sel ong•aniko social media rango bikpilsa mesokatskaenga ineba Mondal parakataha.
Ia a•sel ong•anio NPP-na kam ka•enggipa manderang saknaaniko man•aha aro sakgnide bilongen saknaaniko man•ahani gimin Goalpara hospital-ona ra•angaha ine Mondal suk ong•gijaniko parakataha.
Ia a•sel ong•ani bidingo NPP-ni ku•wattimgipa aro gitcham MLA, Dr Ampareen Lyngdoh suk ong•gijaniko parakatenba mikkangchi indakgipa a•selrang ong•taijachina aro mikkrake kamko ka•angchina District Administration-ko didiataha.