Resubelpara, Feb 8, 2023: North Garo Hills a•jani Mendipathar elakkao Marthon J Sangma manderangni namgipa dilgipa ong•e, dingtang dingtang namroro silroroanirangko ra•baha ine NPP dilgiparang parakataha.
Mendipathar elakkao manderangni janggi tangani bewalrangko aro gadangko namdapatna Marthon Sangma raken jotton ka•enga. Meghalaya a•doko re•a doanio namen neng•nikani ong•a, indiba MDA sorkarini sasono namen dingtanganiko man•aha ineba parakaha.
Re•anggipa bilsi 5-ni gisepo hajalni hajal bakrogipa sorokrangko tariaha, jean batanggimin sorkarini kamrangna bate nambatgipa ong•aha. Marthon Sangma gita dakgipa dilgiparang iandakgipa dingtanganirangko ra•baanio mongsonggipa kamrangko ka•aha ineba demittelangaha.
Mendipatharo jolo re•a doaniko namdapatna aro Marthon Sangma bang•a sorokrang aro dollongrangko tariaha. Uni dilanichi bang•a daka rikani project-rangko a•bachengataha, jekai Soksan-oni Matrang-ona dakanggipa sorok, da•o rikenggipa Soksan-oni Matrang-ona PWD sorok, da•o matchotna sienggipa Damas-oni Matchakolgre-ona PMGSY sorok aro da•o tarienggipa Chirim Dare-oni Dangra-ona PMGSY sorok aro Damring Chibimani Chidaret dollongkoba rikengaha. Jean Thapa Bajar aro Chidaret songko nangdimatgipa ong•achim.
Uandaken manderang re•na-doanio altuae janggi tangani gadangko namdapatani ong•a.
Iana agreba, NPP sorkari batanggimin sorkarini galchipe donanggipa Bajengdoba-oni Damra-ona NH sorokko ro•dapatna ja•ku de•enga. Babupara-oni Dilma Dorengsaram-ona, Do•me Anti-oni Babupara-ona sorokrangko tarina a•bachengataha.
Marthon Sangma Mendipathar elakkani manderangna an•seng baljokani aro samra sampilani cholrangko namdapatna gita bang•a kamrangko ka•enga. Indake, Chidaret-o pallang ge 100 chakgipa Civil Hospital-ko rikanichi, Chidaret aro uni wilwilao dongenggipa songni manderangna samra sampilani aro nama gadango sanna bananiko on•na miksongani ong•a.
Marthon Sangma a•songko rikanio chadamberangni gamchataniko u•ia aro uamangko bil gnangatna uni mongsonggipa miksongani ong•a. Uni dilanichi Mendipathar College-ko People’s College ine ra•gataha. Uni kam ka•anichi bang•a skulrang namdapataniko man•aha aro elakkao cultural aro sports center-rangko dakaha jekai Manikganj Cultural Auditorium. PRIME, jean NPP sorkarini scheme ge•sa ong•a, ua bang•a bading-chiwalaniko a•bachengdilgiparangna dakchakanirangko on•enga, jekai Michael Sangma, jean Chipakram Songgitcham-oni saksa jaktangchi dingtang dingtang bosturangko tarina changgipa ong•a. Ua Meghalaya sorkarini on•gipa PRIME-ni namgnirangko man•gipa saksa ong•a. Michael Sangma gong lak 5 PRIME-ni dakchakaniko man•ne bading chiwalanio bang•a namgnirangko man•aha.
Ua tangkarangchi uni nanggipa gital bosturangko ra•na man•aha aro uandaken uni tarianirangko nambate aro bang•bate dakna man•aha. PRIME, Michael Sangma-ni bading chiwalanio dal•roroani aro chu•sokanina namen dalchakani ong•aha. Ua Tangka-paisarangchi changa sapanirangko skie on•ani aro palna sim•na skie on•anirangko namdapatna aro kamrangko dal•dapatna bang•a man•gnirangko man•aha.
“NGH-ni pilak elakkarangni dilgiparang bang•a silroro namroroani project-ko nikna man•aha. Kharkutta-o sorokrangko, stadiumko, CHC aro uandakgiparangko tariaha. Bajengdoba-o stadium, dingtang dingtang sorokrangko aro chu•gimik namroro silroroaniko nikna man•aha.
Apsandaken Resubelpara-oba ong•aha. “Angni kam ka•na a•bachengani ja•mano, angni elakkana bang•a nangchongmotgipa project-rangko Skotong Minister angna on•aha. Ia kamrangko a•bachengataha” ine Marthon Sangma kusi ong•aniko parakataha.
Ia chu•sokanirangra Marthon Sangma-ni dondikgija kam ka•anichisa ong•aha. Uni on•gilani manderangna aro a•dokna namdapaniko ra•baaha. Ua namgipa aro an•tangko on•kanggipa MLA ong•a. Mendipathar elakkao manderangni janggi tanganiko namdapatna krenge kamrangko ka•aha. Uni manderangna dangdike on•anichi, ua namgipa dilgipa ine bimingko man•aha.