Shillong, Feb 8, 2023: NPP mongsongbate, game cha·giparangni janngi tanganiko namdapatna raken kam ka·enga ine MDA sorkarini miksonganiko parakataha.
NPP aro NPYF-ni Secretary Bajop Pyngrope-ni parakatani gitade, “MDA sorkari kam ka·na chanchisoanirangko game cha·giparang pangnan mongsonggipa bak ong·a. Chingni FOCUS aro FOCUS+, Mission Mode Project-rang aro gipinrang a•doko game cha·giparangni janggi tanganirangko namdapatna aro tang•doatna a·bachengaha.
Ia scheme-ni namgnirangko man·gipa game cha·giparangni bang·a chu·sokaniko man•tokaha. Da·alo game cha·giparangni man·na kragipa cholrangko man·engaha. Chinga game cha·giparangni janggi tanganirangko namdapatana gita krenge kamrangko ka·angkugen” ineba pakakataha.
NPP game cha·giparangko namdapatna chanchisamsogipa kamrangko ka·angkuna, Party-ni miksonganirango game cha·giparangna dingtang dingtang cholrangko bikote on·na taken ja·ku de·na miksonganirang gnang.
NPP-ni miksonganirangko “People’s Document, Vision 2023-28” chong·motan “Manderangni ki·tap, 2023-28 bilsirangna niksamsoani” ine biming donne, West Jaintia Hills a·jani Jowai-o February 4 tariko oprake on·aha.
“Peoples’ Document, Vision 2023-28’-ara mikkangchi ja·ku ga·ani ramasan ong·aija indiba, 2018-oni namroro-silroroani ramako re·angkuani” ong•a ine talate, che·em che·em dake, somoini kri, aro kamko chu·sokatna man·na gita chanchisoanirangko, Vision Document-o tariaha. NPP-ni sasono a·bachengatgipa bang·a namdapatani scheme-rangko janape, ia scheme-rangko a·dokni pilak manderangna namgniko sokatna gita kam ka·angkugen ine ku·rachakaniko on·aha.
Re·anggipa bilsi 5-o NPP sorkari bang·a scheme-rangko a·bachengataha, jeon a·dokni game cha·giparangni nangnikanirangko on·aha. FOCUS aro FOCUS + Mission mode-ni kamrang, Cooperative Society-rangko aro bang·a dolrangko bikote ra·chakani, bosturangko tariani, dongchakani aro tangka-paisarangni bidingo kam ka·anirangko jako ra·e kam a·bachengatani ong•a.
Ua ki·tapo janapani gitade, FOCUS aro FOCUS +ni ning·o lak 3.1 game cha·giparang, Mission Mode Project-rangni ning·o lak 1.5 game cha·giparang aro dingtang dingtang Cooperative-rangni ning·o lak 1-na bate game cha·giparang ia Scheme-rangni namgnirangko man·aha. Unbaksana ia ki·tapni gita, chel·batao donggipa aro a·doko donggipa pilak game cha·giparangona soktike kam ka·na ku·rachakaha.
Ia niksamsoanio, re·baenggipa bilsi 5-ni gisepo, FOCUS aro FOCUS+ a·dok gimikni, je biapo donggenchimoba bilaiprako lak 8 game cha·gipa nokdangrangna namgnirangko on·gen aro Mission Mode Project-rango lak 5 game cha·giparangona sokatgen ine janapaha. Kror 2500-ko FOCUS aro FOCUS+na, Mission Mode Project-rangna kror 1,000-ko koros ka·gen. Ge·a-gamaniko akman-tetmanani ja·mano uarangko tarina dingtang dingtang chimongani aro tarianiko dakna ge 1000-na bate biaprangko a·bachengatna gita miksongenga aro iarangko ge 500 Cooperative Society-rangchi dakna miksongenga. Jean a·dokni ge 10,00,000 game cha·gipa nokdangrangna namgnirangko on·gen.
Game cha·giparangna nambata janggi tangani cholrangko ra·baanirangan NPP party-ni mongsonggipa miksonganirang ong·a. Bang·gija ra•ani aro man·gnirango bang·e man·gipa agri-hroti-hub-na namgipa me·su samjakrangko ge·e game, aka-tetani ja·mano dongrikgipa jabolrangko name galna aro man·gimin biterangko nama damrango palna man·naniara party-ni mongsonggipa kam ong·a.
“Antidamrango pala-sim·aniko apalbatatna, Village Cooperative Society-rang aro Collective Marketing Centre (CMC)-rangko bilakbatatgen aro dal·batatgen. CMC-rango game cha·giparangna dakchakaniko on·ani a·dam dake tarigen, una agreba Custom Hiring Center (CHC)-rangko tarigen, jedakode ge·a gamanio kolrangko bang·bate jakkalna gita man·gen, chinga Chief Minister-ni ‘Farm to Plate’ Outlet-rangko jillarango a·bachengatgen, jedakode songrangoniko ra·bagipa me·surangko nama damo pale on·na man·gen, block ge·antion veterinary clinic-rangko a·bachengatgen, biap ga·nanggija aro diltugiparango donggipa game cha·giparangni bosturangko ra·runa altubatna gita ropeway-rangko tarigen” ine parakataha.
Bilsini je somoioba gari re·na man·gipa sorokrangko tarie a·dokni pilak songrangko nangdimatna NPP party ku·rachakenga. Jedakode, manderang salanti re·rurana man·gen aro ge·a gamanio nanggipa bosturangko sokatna man·gen. Game cha·giparangna aro game ch·agipa dolrangna 50% subsidy-ko ge·a-gamanio jakkalgipa garirangko bosturangko salrurana gita on·gen. Ia ki·tapo janapani gitade airport-rangni sepangrango agri-horti bosturangko chong·motan me·su samjak aro pulrangko a·palchi watatna gita donchakani biaprangko tarigen, jedakode aka-tetani ja·mano jakkalgija galanirangko champengna man·gen.
Iana agreba, game cha·giparang nambata damrangko man·na gita namnamgipa aro dam gnanggipa ge·a gamanirangko dakna gita didina niksamsoanirang gnang. Ia ki·tapo sam-gri ge·a-gamaniko ka·sine re·bana chanchisoanirang, jekai fishery aro veterinary-ni bidingo chadamberangna skie on·anirangko dakna, crop insurance-ni bidingo talate on·na aro dairy technology-na dintangmancha college-ko a·bachengatna miksongani gnang. Indake NPP party pilak namroro-silroroaniko ra·bana chanchisoanirang donga. Jedakode game cha·giparangna namgniko ra·bana aro a·doko ge·e game cha·ani bidingo gimikni gitan namdapanirangko ra·bana man·gen ine Bajob Pynggrope janapataha.