Williamnagar, Feb 1, 2023:Meghalaya Janata Dal United (JDU) dolni Convenor aro Williamnagar elakka-ni MLA candidate Robinus T Sangma, Williamnagar songjinmao mirongni dam rang•san tang•doani gimin suk ong•gijaniko parakataha.
“January jani skanggipa aro gnigipa antirango mirong kg 50-ni dam 700 saanchim, indiba January ja bon•angachibara mirongni dam 1500-ona bariaha. Iani bidingo District Officer-rang nirok sandina nangchongmota. Anga Dudhnoi-ona re•ange mirongni damko sing•sandiaha. Ua jolo mirong kg 50-ni dam 700 san. Indide maini a•sel Williamnagar songjinmao indakpile mirongni dam rakskaenga” ine ua sing•doangaha.