Tura, January 30, 2023: Meghalaya a•doko dingtanganiko ra•bana gita TMC dilgiparang rakbee kamrangko ka•enga. Indake Dr Mukul Sangma a•dok gimiko campaign ka•roroe TMC dolni ming 10 ku•mikchetanirangko aro kamrangko gipatna jotton ka•enga. Dr Sangma Sonibar salo West Khasi Hills a•jani Mawshynrut songoni a•bachenge, damgittam biaprango tom•aniko ong•atangaha.
Mawshynrut elakka-ni manderangna aganprakengon, Dr Mukul Sangma, “MDA sorkariko chalaienggipa NPP dol eleksin somoiosan a•dokko tang•doatna ku•mikchetaia. Uamangni ku•mikchetani kride, a•dokni manderang man•ne cha•na aro gam gnangnasa krajokchim, indiba indake ong•jaha. A•dokni manderang NPP sorkari rikmiting somoio indakpile kosto ong•e gitchianiko man•aha.Batanggipa 2018 bilsini eleksino NPP dolni agangipa kattarangko na•song gualjokma? Uamangni sorkari rika ja 6-ni gisepon koilako bikotpile on•gen ine aganaha. Indiba uamangni sorkari rika bilsi 5 gadapon uamang koila bikote on•kujaenga. Uamangni tol•gramaigipa ku•rachakanina aganchakani somoi sokaha” ine aganangaha.
Unbaksana Dr Sangma Phulbari-o tom•aniko ong•ate, TMC dol sorkari rikna ka•donganiko aganprakangaha. Ua jinmana aganprakengon, “Batanggimin bilsi 5-ni gisepo a•dok sorkari maming tang•dodapaniko ra•bajaha. Phulbari-ko tang•dodapatna nangenga aro niatoatna rakbee kamrangko ka•na nangenga. An•chingni de-su•drang, indakpile gitchianiko man•enga. Uni gimin an•ching ku•cholsan kamrangko ka•e gital sorkariko rikani somoi sokaha” ineba aganangaha.
A•dok sorkari maikai ka•sagija a•dokni a•arangko Assam a•dokna pakwatgalaha, ukoba anga nike u•ia. Uni dakgualaniko namatpilna gita an•ching gital sorkariko rikna gita nangenga. Na•simangni ka•sae on•gipa vote-an dingtanganiko ra•bana dakchakani ong•gen.
East Garo Hills a•jani Rongjeng-oba apsan salo TMC tom•aniko ong•atangaha. “Chinga TMC dolni dal•rikrikaniko nike bilongen katchaa. A•dokni kona noksikon manderang tom•anio re•bae bakko ra•anian, chingni dal•rikrikani aro manderangni ra•chakanian sakki ong•a” ine Dr Mukul Sangma aganangaha.