Tura, January 17, 2022: A•dokni Skotong Minister Conrad Sangma TMC dolni kam gri roenggipa chadamberangna MYE Scheme aro a•dokni me•chikmarangna WE Scheme-ko bikotani bidingo jinmana u•iatengon, “TMC-ni dilgiparang ku•rachakatangko aro ku•mikchetatangko chu•sokatja, indiba NPP-ni dilgiparangde ku•rachakatangko bimang pil•ate mesoka. Chinga NPP dolni dilgiparang game ge•e cha•giparangna FOCUS aro FOCUS+ scheme-ko ra•baaha. Indake ia scheme-ni on•ako man•ne bang•a dakchakanirangko man•tokenga. Uasan ong•aigija chinga ia scheme-ni gita Self Help Group (SHG)-rangna aro a•dokni chadamberangna YESS Scheme-ni gita bang•a dakchakanirangko sokataha. A•dokni lak 3 batgipa dolrangna chinga dakchakaniko on•aha” ine aganaha.
FOCUS scheme-ko chinga eleksin-na skang mangmangsan ong•aija, indiba 2021 bilsini March jaonin a•bachengataha ineba ua agandapangaha.
“FOCUS scheme-ni dakchakanichi a•dokni pilak manderang uamangni janggi tanganio dingtanganiko ra•bana man•aha. Ia program-chi chinga kangal cholgri pilaknan dakchakaniko sokatna jotton ka•enga. Game Ge•e cha•gipa, cha•ani ring•ani tarigipa, sikgipa kogipa, Dakmanda dokgipa pilak kamko ka•gipa manderangan ia scheme-ko man•ani niam donga” ineba aganangaha.
Ma•mong sorkarini on•atgipa PM Kisan Program-ko an•chingni a•dok nangnikja, an•chingni a•doko FOCUS-kosa nanga. PM Kisan Program-ko man•na gita a•dokni manderang a•a dongan baksana a•a pattaba dongna nanggen. Iarangko nangnikani a•selo a•dokni bang•a manderang ia scheme-ko man•rikjawa ine nikenba chinga FOCUS scheme-ko ra•bae on•skaaha ineba agandapangaha.