Tura, January 8, 2023: South West Garo Hills a•jani sak 545-na bate dingtang dingtang dolrang jekai NPP, INC aro AITC dolni manderang Ampati-o ong•atanggipa BJP-ni tom•anio bakko ra•e BJP dolona napangaha ine koborna u•iataha.
Union Minister of State for Minority Affairs John Barla-ni dongpanio SouthbWest Garo Hills a•jani manderang sak 545-na baten BJP dolo napangtokaha.
Uandake Ampati-o ong•atanggipa tom•anio Assam a•dokni Deputy Speaker Dr Nurmal Momin mongsonggipa sokgipa ong•e tom•aniko mikkim gnangataha. Ia tom•anio BJP dolona napgital MLA-rang Ferlin A Sangma, Benedik R. Marak, Assam-ni BJP Spokesperson Rupak Goswami, Ampati elakkani eleksin In-charge Kishore Nath aro dolni membor-rang bakko ra•angaha.
Indake ia tom•aniko Ampati-ni Samati songo ong•atangaha.
Dr Nurmal Momin, jinmana aganprakengon, “Chingni BJP dolko Garo Hills-ni manderang kusi ong•e ra•chakaniko nike blongen katchaa. BJP dol a•doko tang•doanina aro manderangni namgnina kamko ka•gipa dol ong•a ine pilakan ma•sie BJP dolo naptokengaha. Uamangni dolo napanian mikkangchi chingko bil gnangatna dakchakgen” ine aganangaha.