Chokpot, Jan 5, 2023: Kobor man•soani gitade, Chokpot Rongrikimgre songni bilsi 19 ong•gipa me•tra saksako re•anggipa December 31 tarik attamni 7:30 bajimango chu pekgipa me•apa saksa kragija doke saknataha.
Me•chikni pagipa ku•siliting gita kobor ra•timgiparangna parakatani gitade, dos dakgipa Jime Ch.Marak, chu peke chadambe me•chik saksako ripengskachi re•ange, noktangona re•bapilmitting somoio, skatang maming a•sel gri me•chikni ja•man, ja•man re•bae, rang•san gitoko rim•enba kragija mikkango dokaha aro wagamrang be•an baksa skoo biljime saknaako man•ahachim. Songni manderang, me•chikni chrike grapako knae a•sel ong•gipa biapona re•angani gimin, Jime Marak me•chikko watgale katangaha.
Ia a•selni bidingo me•chikni ma•gipa pagipa aro maharirang January 1 tariko Silkigre Pulis Out Post-o badi ka•aha. Jime Ch.Marak, “Chingni demechikko so•otna aro drae til•ekna jotton ka•aha. Indiba rasong gnangbee, manderangni dakchakachi jokaha. Uni gimin Jime Ch.Marak-ko rim•e, niam gita sasti on•na nanga. Maina ua chu peke skatang kragija doke chingni demechikko saknaataha” ine me•chikni ma•gipa pagipa badi ka•e segipa lekkao janapataha.