Tura, November 30, 2022: Garo Hills-ni hajal, hajal manderang a•gilsak gimiko mingsing minggamako man•gipa Michael Learns To Rock (MLTR) aro Smokie Band-ni Lead Vocalist Chris Norman skanggipa changna Garo Hills-o git ring•aniko nisengsoengon, Me•gong Festival-ko ong•atjahani gimin bang•a manderang suk ong•gijaniko parakataha.
“MDA sorkari ta•rake obosta ong•ani bakan bon•kamgipa chanchianiona re•bana nangjachim. Uamang obostarang ka•sinako sengesa ja•ku de•na nangachim” ine WGH a•jani saksa janapataha.
Unbaksana mitam manderang, MDA sorkarini Me•gong Festival-ko bon•atanina jegalenba, “Chel•begipa aro gipin a•ja baksana dingtang jao ong•atna miksonge donsogipa Festival-ko Sorkari dontongatna nangja. Uamang manderangni an•saoaniko aro ku•si ong•aniko kal•ake rona nangja” ineba janapataha.
Sorkari kamoni neng•take dongenggipa saksa skigipa, “Mukroh songo a•sel ong•anio, dos dakgipa manderangna sorkari ja•sku dippana nangja. Indakgipa obostarango rang•san chanchigitike kamko ka•aniara, sorkarini bilgrianiko mesokenga” ine aganataha.
Mitam dokkan dakna bostu chimongsogiparang gimaani ong•aha ine suk ong•gijaniko parakataha.
“Me•gong Festival-ko nina gita chingni Homestay-o dongna bang•a manderang room-rangko tik ka•ataha aro mitamrang tangkarangko gamsoaha. Indiba sorkarini rang•san festival-ko dontongatani a•sel, chinga chu•gimik tangkarangko on•pilna nangaona ga•aka. Chinga an•tangna maming revenue-ko man•rikjaha” ine Homestay-ni nokgipa parakataha.
Me•gong Festival-ko ong•atjani a•sel Garo Hills-ni Tourism sector-na krorni kror tangkarangko gimaatani ong•a. Event Management-oni Hotel-rangona, bang•a songni manderang jemangan dokkan dake krismas-na gong•sa gong•gni kamairikna chanchiengachim, indiba uamangna dal•a gimaani ong•aha ineba parakataha.
“Mukroh-o a•sel ong•ani chu•gimik kattako ma•sigija, Shillong songjinmani mitam manderang Non-Tribal-rangko chadrapaniara kraani ong•ja. Uamang MLP aro Shillong songjinmani Non-Tribal-rangko chadrapaniara, a•dokna maming namgniko ra•bajawa” ine Garo Hills-ni saksa Educationist Tyrone D Brass aganaha.
Una agreba a•dok sorkari, a•dokko name nirokna aro simsakna changgijaniko nike tourist-rang batesa a•dokona re•bana gong•jawa ineba ua janapataha.
“Shillong songjinmao aro Garo Hills-oba Festival-rangko ong•atgija dakani maming orto dongja. Uamang indakgipa festival-rangko ong•ate manderangko an•sengata aro ia bilsi bang•a International Band-rangko aro Artist-rangko rimbaanina a•dokni manderang katchabee nichaksoengachim. Uamang a•dokni obostako a•doko namatna jotton ka•na nanga. Union Home Minister-ko grongna re•anganiara, uamangni obostako an•tangtang jako ra•na changgijaniko mesoka. MHRC Assam pulisrangni goe siatani bidingo segatangaha ong•ode, uamang maming dakeba Delhi re•angna nangjachim” ineba ua koborna u•iataha.