Tura, Nov 24, 2022: Nangrimgimin Garo Hills-ni NGO-rang jekai FKJGP, ADE, AYWO aro FAF, November 22 tariko West Jaintia Hills a•jani Mukroh songo Assam pulisrang aro forest guard-rang silai goanichi sak 6 manderang an•tangtangni gamchatgipa janggirangko gimaatahani gimin, Black Flag Day ba Ba•ra gisimko ra•bite aro dokkanrango songdoe Budbar salo Tura aro Garo Hills-ni dingtang dingtang biaprango kalimpaaniko dakangaha.
“Assam pulisrang aro Forest Guard-rang bol salgipa truk gari bolsa Mukroh songchi re•angako rikangenba, ong•gija dake mirong salanggipa gipin gari bolsako rim•ahani gimin, songni manderang rikbae ong•gija gariko maina rim•a, ine uko watchina jegrikmitting somoio pulisrang silai goaha. Indake Assam pulisrangni Mukroh songo napdrae silai goani a•sel dos gri songni ramram manderang janggitangko gimaataha. Assam pulisrang bang•a changon, sima ario donggipa Meghalaya a•dokona napdrae, manderangko singjetaniko on•ronga aro dos gri manderangko skatang rim•e jail aro pattokrango chipronga. Indake Assam pulisrang nangana bate bilko jakkale Meghalaya a•dokni manderangko kal•stekaniara ra•chakna amgijani ong•a aro chinga NGO-rang raken jegala” ine FKJGP-GHZ-ni President Pritam Arengh parakataha.
Assam pulisrang niamni kosako re•e, a•dok gipin-ni jurisdiction-ona napdrae an•tangtangni bilko mesokenga. Pulisrang aro gipin Officer-rang maming saloba gipin jurisdiction-o nape kam ka•na aro manderangko rim•na man•ja. Indiba Assam pulisrang Meghalaya-ni manderangko skatang napdrae neng•nikaniko on•enga, indakgipa Assam pulisrangni kamko Meghalaya sorkari nie dongaigenma, indakgipa a•selrangoniko naljoke rakkina aro chel•chakaniko on•na man•na gita, Skotong Minister Conrad Sangma Assam sorkari baksa chanchirimaniko dake tom•tomaniko ra•bana nanga ine Pritam Arengh didiataha.
Jedakode mikkangchi indakgipa a•selrang ong•taijawa ineba NGO-rang Conrad Sangma-na mikkrakatani ku•rangko on•ataha.
Indake Garo Hills-ni dingtang dingtang biaprango NGO-rang mombatirangko so•e sianggipa Khasi Jaintia ripengskarangna bi•chake kalimaniko dakani ja•mano November 25 tariko sianggiparangko mande ra•e, kontagni attam 1 bajioni 3 bajiona Garo Hills gimiko NCM-ko ong•atna tik ka•angaha.
Uni gimin pilak dokkan dakgiparang, bading chiwalgiparang, office-o kam ka•giparang aro gari gora salgiparang kontagni mangmangna chakchike bakrimpachina NGO-rang mol•molataha.
Indiba NCM-ni somoio nangchongmotgiparang jekai ambulance-rang, sam dokkanrang, MeECL department, personal nanggiparang, chatro chatrirang aro skulrangko watatigen ine parakataha.