Williamnagar, Nov 22:Meghalaya Pradesh Youth Congress Committee (MPYCC), Garo Hills-oni Assam aro Meghalaya sima ario donggipa West Jaintia Hills-ni Mukroh songo Asaam pulisrangni silai goanichi dos gri sak 5 ramram manderang janggitangko gimaataha aro bang•bea manderang saknaako man•ahani gimin raken jegalataha.
Ia a•sel ong•anio duko ga•akenggipa nokdangna MPYCC-ni General Secretary Junebirth C.Marak, Garo Hills Youth Congress-ni palo gisik ka•tong gimikchi duk ong•e kalimpaaniko on•ata baksana, saknaako man•enggipa manderang ta•rake nampilchina nama sikaniko parakataha.
Garo Hills Youth Congress, a•sel ong•anichi duko ga•akenggipa nokdangrang baksa bakrimpaaniko parakatenba, uamangni nemg•nikengmitting salrango dakchakpana sikaniko parakataha.