Tura, November 18, 2022: Meghalaya a•dokni Skotong Minister Conrad Sangma Bristibar salo Garo Hills a•jani manderangna Payment of Ecosystem Services (PES)-ni gita tangka gong kror 15-ni cheque-rangko District Auditorium Tura-o suale on•angaha.
Green Meghalaya, “Grassroot Level Response Towards Ecosystem Enhancement and Nurturing”, manderangna pattigimin buring bolgrimrangko name jakkalna aro taridapna, chengoni dakrongbaenggipa bewalo ripingna miksongena ine aganangaha.
Skotong Minister jinmana aganprakengon, songni Manderang buring bolgrimrangko ripinge rakkina bimchipe kam ka•giparangoni ong•a. Green Meghalaya Scheme buring bolgrimrangko ripingna kamko ka•na gita kror 50 tangkarangko chamme donaha.
Buring bolgrimrang komiangani a•sel bang•a chiring chibikrang tipanganiko, sal ding•aniko aro global warming-ni a•gilsak gimikchi ta•rake gipaniko nikna gita man•engaha. Uni gimin MDA sorkari buring bolgrimrangko rittimatpiltaina aro tangkame rakkiangna miksonge, Green Meghalaya Scheme-ko ra•gataha.
“An•ching manderang aro do•o matrang buring bolgrimo pangchake janggi tanga. Meghalaya a•doko 76 percent buring bolgrimrang gnang, jean 96 percent buring bolgrimrangko songni manderang an•tangna jakkala aro 6 percent buring bolgrimrang Forest Department-ni ning•o ga•aka. Uni gimin songni manderangna dakchakaniko on•an baksa buring bolgrimrangko ripingna Green Meghalaya Scheme-ko ra•gataha” ine aganangaha.
Ia scheme-na World Bank, Community Led Landscape Management Program-ni gita dakchakaniko on•an baksana fund-rangko sokatenga. Indake a•a hector 5 donggiparangna bilsi 5-na kingking buring bolgrimrangko ripinge rakkina dakchakaniko on•gen. Uandake Garo Hills a•jani dam 298 songni manderang seokako man•ne ia scheme-ni gita dakchakaniko man•enga. Skotong Minister gong kror 6-ni gita dam 298 songni manderangna tangkarangko sualangaha.
WGH a•jani Deputy Commissioner Swapnil Tembe ia tom•anio bakko ra•e, indakgipa nama cholko watgalpachina aro kimkim ong•e buring bolgrimrangko ripingangchina sakantikon didiangaha.