Williamnagar, November 13, 2022: A•chik jatni dakbewal rikbewalko ripingna NGO-rang aro Nokmarang rakbee kamrangko ka•genchimoba, East Garo Hills a•jani ning•o donggipa Rongsak Village Court-na Lasker-ko songanio seokako man•gipa mandeko CEM rachakujaenga.
“Anga NGO rangni songbado gatatgipa” Rongsak Village Court-na Lasker eleksin-ko ong•atani ja•mano, Rongram Village Court-na seokgipa Lasker-ko CEM ra•chakaha’ ine seatako niksoe, anga bilongen gisiko suk ong•jaha ine JD (U) dolni General Secretary Joshua Marak parakataha.
Rongsak Village Court-o Lasker-na seokako man•na kragipa mandeko CEM ra•chakpiljaha. GHADC-ni Rural Administrative Department August 22 tariko Rongsak Village Court, Mauza number 4, Elakka no. 46-o Lasker-ni chokkina eleksin-ko ong•atangaha, jeon sak gittam candidate, Janggin T Sangma, Kewingson Marak aro Arbitson Marak bakko ra•angaha. Rongsak Village Court-ni ning•o dam 46 A•kingrang gnang jeon sak 39 Nokmarangsan bakko ra•na gita man•aha, uanoni sak 5 Nokmarangni vote-ko jegalaha. Indake sak 34 Nokmarangni vote-kosan chanaiaha. Ia eleksino Janggin T Sangma king 31 vote-ko man•enba chegipa ong•aha, Kewingson Marak king 2 vote-ko man•aha, Arbitson Marak king 1 vote-kosan man•aiaha. Mitam Nokmarangni u•iatani gitade, Eleksino chegipa Janggin T Sangma, uni cheaniko jinma baksa manina gita jinmana alangaha.
Indiba king 34 vote-oni king 31 vote-ko man•ne chegipa Janggin T Sangma-ko CEM da•ona kingkingba ra•chakujaenga. Da•o re•baenggipa 2023 bilsio JD (U) dol sorkari rikna cholko man•genchimode, chinga jatni dakbewalko ripingna aro 2024 bilsini MDC eleksino jatni namgnina re•mikkange kamrangko ka•anggen ” ine Joshua Marak parakataha.