Shillong, September 8, 2022: East Khasi Hills a•jani Anti-Narcotic Task Force (ANTF) sombar aro monggolbar salo drugs badinggiparangko joljol rim•a ja•manan koborrangko mon•sotaie kimkime sandirikote kamrangko ka•enba drugs badinggipa dingtang dol sak bri manderangko budbar attamon rim•taiaha ine koborna parakataha.
ANTF dolni karimskarang rakbee kamrangko ka•enba budbar attamni bak o Dhanketi gittim oniko drugs badinggipa manderangko rim•angaha.
Rim•a man•gipa sakbri manderanga bilsi 34 onggipa Pollingstar David Nongsiej jekon Lease ine ma•sitokbata, bilsi 32 onggipa Haokholal Vaite, bilsi 44 onggipa Thangabui Thado, bilsi 33 onggipa Jessie Lalsangzual maang ong•a ine Superentindent of Police, Vivek Syiem u•iataha.
David, Haokholal aro Thangabui ko pulis dolrang Dhanketi bus shed sepangniko rim•aha, indake Lalsangzual ko uamang bus shed sepango donggipa parking lot niko rim•skaaha ine u•iataha.
Pulis dolrang uamangoniko sabon case o chipe ra•bitenggipa drugs ko ge 15, ge gittam vials jeon heroin gram 188.40 mangni gita dongachim, lak 35 tangkarangko, mobile phone ge 5 aro gitalgipa scooty Yamaha Ray ZR 125 ko man•aha. Ia obostani bidingo Laitumkrah PS o badi kaaniko dakangaha