Tura, September 5, 2022: East Garo Hills a•jani skigipa saksa Ma Gamchi Timre R. Marak, skigiparangni salko maniani salo India A•songni Skotong Songjinma New Delhi-o “National Award” ko man•aha. Ua neng•bee aro gisiko nangbee kam ka•ani kri mingnamgipa bimingko man•aha.
Ma Gamchi Marak a•songni President Droupadi Murmu-ni jakoniko New Delhi songjinmao donggipa Vigyan Bhawan-o National Award-ko ra•chakaha. Ua National Award man•anggipa sak 45 skigiparangoni sak 1 ong•achim. Ma Marak East Garo Hills a•jani, Samanda Educere Higher Secondary Skulni Head Teacher ong•e skigipani kamrangko ka•anichi gamchatgipa Award-ko man•aha.
“Anga ia award-ko man•ne bilongen kusi ong•a aro katchaa. Ia Award-ko man•ani altubegipa kam ong•ja. ian angni janggi tanganio rakbee kamrangko ka•anichisa ong•a ine anga bebe ra•a” ine Ma Gamchi Timre Marak aganaha.
Uni janggi tangani gimin aganprakengon, batanggimin sal somoirango Williamnagar songjinma da•o gita ong•jachim, indiba da•alo Bidani bilchi Williamnagar songjinma dingtangaha aro namen tang•dodapaha ine aganangaha.
Gamchi Marak-ni aganani gitade, batanggimin bilsirango uamangni songo maming tang•dodapani dongjachim aro songni manderang namen kangal cholgrichim. Ua somoirango bang•gija manderangsan poraia skia dongachim. Uni segipa sorkarini kamko man•ahaoan uamang East Garo Hills a•jani Williamnagar-o kam ka•na baseaha.
Social Sector-o donge kamrangko ka•engon, ua manderangni bidana sikkimaniko aro nangnikaniko u•ina gita man•aha.
“Manderang Bidako nangchongmota. Bidachisa songko nokko tang•dodapatna man•gen. Angni NGO-o kamrangko ka•engmiting somoio manderang ango ka•dongtokaha, indake uamangni ka•donganiko man•ne, anga skulko kuliaha. Angni miksonganiara, chadamberangko an•tangni ja•ao chadengna ka•donggipa ong•atani aro a•chiko nikome re•gija nigitoe re•atna miksonganian ong•a” ineba ua agandapangaha.