GH-ni NGO-rang MoU-ko jegale namnikgijaniko mesokna jingjengatani tom•tome matchotanga 

Tura, Aug 22, 2022: Meghalaya aro Assam a•dokni Skotong Minister sakgni sima ario songdongenggipa a•ani nokgipa Nokma Sordar-rango, songni manderango aro District Council-ni dilgiparango mamingkoba sing•chenggija an•tangtangni sikagita, re•anggipa March 29 tariko soi ka•grikgimin Memorandum of Understanding (MoU)-ko jegale namnikgijaniko Garo Hills-ni NGO-rang aro Khasi Hills-ni dingtang dingtang NGO-rang bakrime Sombar salo Shillong Civil Hospital sepango donggipa U-Kiang Nangbah-ni bimangko tarie dongipa biapo asonge jingjengatani tom•tome matchotangaha.

A•dok damgnini skotong minister-rang chanchigija MoU-o soi ka•ani a•sel Meghalaya a•dokni mitam A•chik songrangko Assam-o napatahani gimin Garo Hills-ni NGO-rang batanggimin salrango changni chang tom•bimonganirangko ong•ate, MoU-ko den•galpilchina aro nipiltaianiko dakchina a•dok sorkariko mol•molahachim.

Indiba a•dok damgnini sorkarirang NGO-rangni dabianiko knachakjaha. “Conrad Sangma a•ani nokgipa ong•ja aro Meghalaya-ni a•arangko skatang gipin a•dokchi pakwatatna man•ja. Meghalaya-o songdongenggipa manderangni a•arangsa ong•a. Maming dakeba Conrad sakan Meghalaya-ni a•arangko Assam-chi chapatna man•ja” ine ADE, HQ-ni President Dalseng Bira Ch.Momin kobor ra•timgiparangna aganaha.

Ia jingjengataniko dakanio sorkari mamingkoba knachakja ong•ode, mikkangchi rakbata ja•kurangko de•e jingjengataniko dakangkugen, jena kingking dabianiko knachakja jingjengataniko dontongjawa ineba NGO-rang parakataha.

NGO-rang Shillong songjinmao Conrad Sangma-ni kamko jegale namnikgijaniko mesokna jingjengate matchotanj ja•man a•dokni Skotong Minister Conrad Sangma-ko gronge segimin lekkako on•na miksongachim. Indiba Skotong Minister Shillong-o dongjani gimin Monggolbar salo gronge on•angskagen ine NGO dilgiparang parakataha.