Sima arini bidingo soi ka•grikgimin MoU-ko jegale Shillong-o jingjengatna GH-ni NGO-rang re•chakatanga

Tura, Aug 21 2022: Meghalaya aro Assam a•dokni Skotong Minister-rang re•anggipa March 29 tariko soi ka•grikgimin Memorandum of Understanding (MoU)-ko den•galpilchina dabie jegalana Garo Hills-ni NGO-rang Robibar salo Shillong songjinmaona re•chakatangaha.

Meghalaya a•dokni adita A•chik songrangko Assam-o napatahani gimin namnikgijaniko mesokna Garo Hills-ni dolbri NGO-rang ADE, FKJGP, AYWO aro FAF August 22 tarik Sombar salo Shillong Civil Hospital sambao donggipa U-Kiang Nangbah-ni bimangko tarie dongipa biapo asonge jingjengatanggen ine parakataha.

NGO dilgiparangni parakatani gitade, Meghalaya aro Assam a•dokni Skotong Minister Conrad Sangma aro Himanta Biswa Sarma MoU-o ka•grikani a•sel Meghalaya a•dokni sima ario songdongenggipa manderang so•sojengjeng duk mikchi ong•e, Assam pulisrangni doka satako aro dingtang dingtang kamrangchi sinjetaniko on•na baksana dos gri manderangko rim•e pattokrango donatako man•enga.

Meghalaya a•dokni adita A•chik songrangko Assam a•doko napangahani gimin ua songrangni dingtang dingtang dolrang Garo Hills-ni NGO-rangko dakchakchina mol•molahani gimin batanggimin salrango NGO-rang changni chang tom•bimonganirangko ong•ate, MoU-ko den•galpilchina Meghalaya a•dokni skotong minister Conrad Sangma-ko mol•molahachim, indiba a•dok sorkari soi ka•gimin MoU-ko den•galpilna jechakengani gimin ua songrangni manderang duk mikchi ong•e janggi tangna nangenga.

“Chinga changni chang soi ka•gimin MoU-ko nipiltaichina a•dok sorkariko mol•molahachim, indiba chingni mol•molaniko knachakjahani gimin, A•chikskani duk mikchi ong•ani somoio an•ching A•chikska ong•e dakchakaniko on•na nangenga” ine ADE HQ-ni President Dalseng Bira Ch.Momin parakataha.