Tura, Aug 7, 2022:Garo Hills-ni bang•a dingtang dingtang BJP dolni dilgiparang pulisrangni harass ka•ani gimin jegalattokaha aro Tura-ni MDC aro State Vice President Bernard N Marak-na chakpae uko eleksin-na skang indake dakaniara politics kal•chongmotasa ine jinma jegalattokaha.
Ia mamla ba case-ko jakgittele (indepentdent) sandianiko ba inquiry-ko dakchina Garo Hills-ni BJP dilgiparang dabiangan baksana ia mamla (case)-ko kakket bichalona ra•bana gita Tura-ni SP aro DC-ko kam ra•galchina dabiangjolaha.
Jedakode West Garo Hills-ni skotong songjinma Tura-o A•chik DC aro SP-ko donna nangchongmota, maina Khasi Hills-ni skotong songjinma Shillong-o Khasi-ska DC aro SP-ko dona, gipin jatrangko donja.
Tura-ni SP, VS Rathore-ni gimin bang•a complaint-rangko man•enga, A•chik pulisrangkode mingsa gualaniko nikon joljol suspend ka•enga, indiba VS Rathore jatskakode dos dongoba jrip nie dongenga ine BJP dilgiparang koborna parakaha.
Indake a•paloni re•bagipa gipin jatrangsa A•chikrangko sinjetbatenga iarangko BJP raken jegala aro indakgipa SP-ko Tura-o dongna on•jawa. Conrad Sangma, Bernard Marak-ko rimaniara politics ong•ja ine aganenga. Ia politics ong•jaode, Conrad Sangma ka•dongmanchaode indita scam on•giparangna CBI inquiry-ko da•on ta•rake dakchina ge•etaniko on•bo aro Tura-ni SP-ko ra•galchengbo iako dakna man•jaode iarang gimikan nangni jak donga ine ma•siskagnok ineba Garo Hills-ni BJP dilgiparang janapataha.