Tura, July 20, 2022: Garo Hills a•jani SSA skulo skigiparang, Monggolbar salo Tura Government Kolege field-oni DC office-ona jinma re•jome uamangni man•gniko on•china dabiangaha.
Garo Hills-o SSA skigiparang jinma re•jomaniko dakenba, WGH a•jani Deputy Commisioner-ni jak gita Skotong Minister Conrad Sangma-na uamangni segimin memorandum-ko ong•angaha.
Indake Monggolbar saloni sima ari dongija asonge jingjengataniko a•bachengataha.
Meghalaya-ni TMC dilgipa, George B Lyngdoh Shillong-o SSA skigiparangko grongenba skigiparangna chakpaaniko parakangaha. Apsandake West Garo Hills a•jani TMC Convenor Richard Marak baksa Tura-ni gitcham MDC Rupert Sangma aro WGH-ni TMC Coordinator Sapford N Sangma, SSA skigiparangko gronge skigiparangna chakpae, skigiparangni man•gni dormaharangko ta•rake on•china a•dok sorkario dabiangaha.
Indake ong•engon, All Garo Hills SSA Skul Teachers’ Association (AGHSSASTA)-ni President, LG Momin-ni u•iatani gitade, uamang sal 10-na senge nikugen. Indiba sal 10-ni gisepo uamangni dabianiko knachakjaode, dal•a jingjengatanirangko ong•atanggen ine parakataha.
Meghalaya Samagra Shiksha Abhiyan Skul Association (MSSASA), Shillong Secreteriat office sepango donggipa paikhana mikkango asonge jingjengataniko ong•atskaha. Ia asonge jingjengatanio bang•a skigiparang bakko ra•enba walgimik soroksamo asonge dabianiko dakenga.
Meghalaya a•doko an•tangni klas ra•gnirangko wate uamangni man•gni dormaharangko on•china dabianiara, ian skanggipa changna ong•jaha.
Indake SSA skulo skigiparang Shillong aro Tura songjinmani ramarango ka•oksie uamangni man•na nangenggipa dormaharangko dabiangaha.
MSSASA-ni President, Aristotle Rymbai, “An•ching a•dokni sorkari an•chingko sorokona ong•gonne dormahatangko dabiaona sokataha. Chinga sorkario chingni man•na nanggni dormaharangko on•china changni chang mol•molaha. Indiba chingni mol•molani indinsa ong•gramaia. Chinga adita walrangna soroko tusina nanggenchimoba, chinga tusiaigen. Ia changde chinga an•tangni dormaharangko man•na nangtelani gimin janggitangko on•kangpileba jingjengataniko dontongjawa” ine parakataha.