Shillong, July 14, 2022: Batanggimin salrango a•dokni gitcham Skotong Minister Dr. Mukul Sangma aro uni dol bang•a songrango tom•anirangko ong•ate NPP dolni dilgipa aro a•dokni Skotong Minister Conrad Sangma-ni kosako matnange agananiko Conrad Sangma raken jegalatskaha.
AITC dilgipa Dr Mukul Sangma-ni matnanganiko knae Conrad Sangma Bristibar salo kobor ra•timgiparangna agantalatskaha.
“An•ching a•dokni manderang indakpile sa•dikako saknaako man•aha, uamangni gitchianiko aro saknaaniko nike dakchakaniko on•enggipa sorkariko dos gale matnange agana nangja” ine Conrad Sangma aganatskaha.
Monggolbar salo Opposition dolni dilgipa, Dr Mukul Sangma, “Angko aro angni dolko 2023 bilsio chegipa ong•atgenchimode anga Meghalaya aro Assam a•dokni soi kagimin Memorandum of Understanding (MoU)-ko ra•gale galgen ine parakangaha.
“AITC dol bilsi 8-na Meghalaya a•dokko chalaigenchimoba uamang Meghalaya aro Assam a•dokni sima arini bidingo maming kamko ka•jaha aro ja•kuba de•jaha. Indiba jensalo MDA sorkari ia obostani bidingo ja•ku de•aha, uamang ia obostani bidingo mamingkoba ma•sigija gipinko matnangenga. Ia obostako namatna chinga NPP dol ja•ku de•ani gimin kusi ong•chakani pal batesa, manderangko ding•chaoate matnangenga” ine Conrad Sangma janapataha.
Dr Mukul Sangma Meghalaya aro Assam a•dokni kajia golmalko namatna kam ka•ani pal batesa manderangko ding•chaoate golmalko dal•dapatna jotton ka•enga aro gipin dolni kosako matnangenga. Uamang manderangni gisiko namgijako gapate roani pal gipin kamrangna gisiko nangode nambatgen. Meghalaya aro Assam a•dokni sima ariko namatna, NPP dolna skang sorkariko rikanggipa dolni document-rangko on•gipao pangchakesa ma•mong sorkari ba raiko on•aha. Indiba uamang da•alo iarangni gimin mamingko ma•sija ineba Conrad Sangma agandapataha.
Uasan ong•aigija, chinga NPP dol mikka jimbee waanichi nosto ong•ako man•gipa songni manderangna dakchakanirangko sokatna kamko ka•enga aro ia kamko matchotani bakan, sima arini gimin chanchirimaniko dakangtaigen ineba parakataha.