Shillong, July 13, 2022: Printing and Stationery Department-ni Director, Salgira R Marak jekon bilsi gittamna skang maming u•iata gri aro maming dos griko kamoni a•rikgalahachim, ua Sombar salo High Court-ni ge•etaniko man•ne kamtangona re•angplaha ine parakataha.
Printing and Stationary Department-ni Secretary, Matsiewdor War June 7 tariko High Court-ni ge•etanio pangchake July 6 tariko Salgira Marak-ko kamona re•bapilchina didiataha.
“Bilsi gittamna skang angko skatang maming pangchakani gri kamoni a•rikgalaha. Indake anga bilsi gittamna kingking High Court-ni raiko senge dongaha, da•alo anga krenge jotton ka•ani biteko man•pilaha. Angko High Court Printing and Stationery Department Director-ni chokkio asonge kamko ka•angpiltaina cholko on•taipilaha. High Court-ni June 7 tariko sorkarina on•atgipa raiko mande ra•gija aro ja•rikgija donanina, anga July 6 tariko sorkarini kosako badi ka•na High Court-ona re•angahachim, indiba uni attamon angko kamona okamatpile angna Joining Letter-ko on•ataha. Anga June 7 tariko High Court-ni ge•etaniko man•ne, Department-ona re•angrongahachim, indiba angni chamberko dala teke donani a•sel anga a•palosa chadenge rona ga•akaha” ine Salgira Marak u•iataha.
Meghalaya sorkari 2020 bilsini November 20 tariko u•iatgipa, Printing and Stationery Department-o Officer on Special Duty (Technical)-ni kamo Director-ko gital postona ra•doataha ine u•iataniko High Court June 7 tariko jegalatan baksana ra•chakjaha. Indake Salgira Marak-ni seatgipa petition-ko man•soe High Court-ni Justice HS Thangkiew sorkarini kamko jegalate ra•chakjaha.
Printing and Stationary Department-ni Director-ko gital tarigipa OSD postona watatskae Joint Director ED Tariang-ko 2019 bilsini September 8 tariko Director-ni kamko ka•angskachina ge•etangskaha ineba Salgira Marak u•iataha.