Dudhnoi Pulisrangni ka•saninggijagipa kamko Social Activist ma•gipa saksa jegala
Tura, July 7, 2022: Re•anggipa July 4 tariko Dudhnoi pulis station-ni pulisrang Dainadubi-ni me•chik saksako Dudhnoi Thana-ona okgamate, ka•saninggija an•chi pari nikpile doka satani bidingo Garo Hills-ni ma•gipa saksa Social Activist, Jaynie Sangma raken jegalataha. Jaynie Sangma Budbar salo duko ga•akenggipa me•chik-ko gronge sing•sandianiko dakanio pulisrangni kragijagipa kamko ma•sina man•aha.
Dudhnoi Pulis Station-ni pulrang kragija me•chik saksako an•chi pari nike dokako man•gipa me•chikni ja•a jak aro be•en bimango bilongen saknaako man•ahachim.
Ua me•chik bilonge saknaako man•ahani gimin sanna bananiko dakengon, ua me•chik chakatna man•gija saenga ine koborna u•iataha.
Iani bidingo sing•sandianiko dakengon, “Anga pulis department gimikko matnange aganja, indiba jensalo manderang maiba dakchakaniko man•na thanaona re•angode, pulisrang manderangna ka•sae dakchakani pal batesa ku•keng wakeng manenge watronga. Indake Pulisrangni ka•saninggijagipa kamrang Indiani bang•a bakrangon ong•enga ine nikna gita man•gen. Niamko rakkina sikjaode aro manderangna dakchakna u•ijaode, pulis uniform-ko ganna nangja. Niamkon manderangsa rally-rang ka•pile pulisrangna skina nangode, namen kratcha•ani ong•jama? Uni gimin anga manderangko indake kragija kal•steke roaniko aro doka sataniko raken jegalata baksana duko ga•akgipa mandena kakket bichalko on•china Assam sorkariko didiatenga” ine Jaynie Sangma janapataha.
Pulisrangni kamara manderangna dangdike on•anisa ong•a, indiba bikpilsa dos gri manderangko kragija kal•ake roanide pulisni kam ong•ja, manderangna chel•chakaniko on•na aro namgijagipa manderangko rim•e bichal ka•china gitasa pulis department-ko sorkari rakkia ineba Jaynie Sangma janapataha.
Jaynie Sangma-ni janapatani gitade, Goalpara pulisrang Budbar salo saknaako man•enggipa me•chikko statement ra•na skanggipa Dudhnoi Thana-ona, gnigipa Damra Thana-ona aro gittamgipa Dainadubi Thana-ona okgamate neng•nikaniko on•ani gimin Jaynie Sangma jegalatenba saknaa man•gipa me•chik maidake re•angna man•gen, man•jawa ine aganatani ja•manosa Goalpara Pulisarang saknaa man•enggipa me•chikni nokona walo re•ange statement-ko ra•angaha ine u•iataha.
Pulisrang maming saloba dukko man•enggipa mandena neng•nikaniko on•na man•ja, pulisrangsa duko ga•akenggipa mandeni nokona re•ange sing•sansianiko dakna man•a ineba janapataha.
Iandakgipa pulisni kamko Jaynie Sangma raken jegalataha.