Tura, June 12, 2022:Tura songjinmani Development Committee-ni membor-rang Contractor-rangni kamko name nirok sandina nanga aro ua kamrangko jako ra•e ka•enggipa Contractor-rang, Register ka•gimin Contractor-rang ong•ja ine Tura-ni MDC Bernard N. Marak parakataha.
“Smart Town Project-rangko Loan-ni gita man•a, indiba RTI ka•anio ia Project-rangko Register ka•gijagipa ba Unregistered Contractor-rangnasa on•a ine ma•sina gita man•aha. Bang•a gittimni manderang contractor-rangni kamna suk ong•gijaniko parakattokaha. Contractor-rang name kamrangko ka•jagenchimode, gittimko nitodapatani aro sildapatani gimagnok aro tangka indinsa ong•aignok. Development Committee-ni manderang Contractor-rangni kamko name sing•sandina nanga aro nirokna nanga.Jedakode gittim ge•antion name kamrangko matchote ka•na man•gen aro Contractor-ni kamna gittimni manderang kusi ong•ama ong•ja, uko sing•sandichengesa bon•kamgipa bill-ko okna on•na nanga. Ia Project loan-ni gitasa ong•ani gimin Development Committee-ni manderang kam ka•aniko name nirok sandina nanga. Mikkangchi 2023 bilsio sorkariko rikenggipa dol loan-ko gampilna nangnaba gnang. Uni gimin kamrangko name ka•na nanga. Angni chanchiani gitade, gittimatini Development Committee-nan kamrangko tikatna nanga” ine Bernard Marak janapataha.
RTI, ka•anio ma•sina man•ani gitade, bang•bata Contractor-rangan Register ka•gijagipa aro kam ka•na changgijagiparang ba experience ong•gijgiparangsa ong•a. Development Committee-ni manderang Contractor-rangni ong•gija kam ka•sretanirangko nikgenchimode, MDC-ona re•bae nalis ka•ena gita man•gen.
Uni gimin bang•a gittimni manderang Contractor-rangni kamna suk ong•jae badi ka•aha, uamangni kattarangko knachake Department-ni manderangko badi ka•anggen. Manderangni ba jinmani tangkarangko sikatang kal•ake rona aro jakkalsretna man•ja ineba Bernard Marak janapataha.