Tura, June 9, 2022: Koborna u•iatani gitade, Boldamgre A•kingni a•arangko niam gri Boldamgre songni sak 4 manderang sriksrik gipin jatna pale cha•ahani gimin, Boldamgre A•kingni Nokma Challang M.Marak Singgimari Pulis Outpost-o badi ka•aha.
Boldamgre songni Maharirang apsan ku•mong dongimin niamni kosako re•an baksa Meghalaya Land Transfer Act 1972-o pzngchake see rakkigimin niamko pe•ani ong•a ine Boldamgre songni Nokma parakataha.
Koborko u•iatani gitade, Boldamgre-ni Nokma aro songni manderang batanggimin somoio tom•e chanchirimaniko dakenba, A•king ning•ao ga•akgipa a•arangko darangba gipin jatrangna palna man•jawa ine tik ka•ahachim. Indiba songni sak 4 manderang Nokmani aro Maharini dongimin niamko manigija pe•drae A•kingni adita a•arangko gipin jatna palaha ine Challang Marak parakataha.
Boldamgre songni a•arang Sko Maharini a•arangsa ong•achim, je manderangan songo dongachim, uamang songni manderangsan ong•aia, indiba a•ani nokgipa ong•ja. Uamang a•arangko skatang palsruke cha•na maming bil dongja. Indiba songni adita manderang niamko pe•enba rorirangna a•ako palsrukaha.
A•kingni a•ako palsrukgipa manderanga Batjing Marak, Nanda Sangma, Meena Sangma aro Metel Sangma ong•a. Uamangni palsrukgipa a•ako breskagipa Assam a•dokni roriranga Basa-ni depante Perajul, Mojit-ni depante Kobedul mang ong•a. Uamang Boldamgre songni Sko Maharini a•arangko sriksrik palenba, Boldamgre songo dongenggipa A•chikrang baksa rorirangko bobil dinggrikatna jotton ka•enga ineba u•iataha.
A•arangko srik srik palgipa aro bregipa manderangko IPC 34, 153-A, 120-B, 379, 415, 441, 420, 382-A-o pangchake rim•e uamangko niam gita sasti on•na nanga ine Nokma Singgimari Pulis Pulis Outpost-o badi ka•aha.