Ampati, June 9, 2022: South West Garo Hills a•jani ning•o donggipa Mellim Chengkurigre songo Ringde chi dal•bae, bang•a nok-jamrang chi ripako man•tokaha ine songni manderang u•iataha.
Bang•a nokdangrang chi ripako man•ne, nok jamrang bosturang, bagan barirang, jila kaanirang aro rama jal•angrang nosto ong•ahani gimin namen neng•nikaniko man•tokenga ine u•iataha.
Unbaksana, Mellim Sub-Centre-ko chi ripani a•sel hospitalo kam ka•enggipa nurse-rangko songni manderang dakchake jokataha. Apsandaken Mellim Chengkurigre Mondolni pamong saksani nok aro gariko chi ripaha.
Indake rang•gitik Ringde chi dal•bae songni manderang neng•nikaniko man•tokaha aro walni somoio nokrangko chi ripani a•sel nokni manderang naljokgipa biapona katange dongna nangaha. Indake bang•a nok jamrang chi ripako man•ahaoba Mellim Chengkurigre jolni manderang darangba janggitangko gimaata gri naljokaniko man•aha ineba u•iataha.