Tura, June 9, 2022:West Garo Hills a•jani Gambegre C&RD Block-ni ning•o donggipa Chenggapa-oni Purakasia-ona dakanggipa mongsonggipa sorok aro gipin jolni rama sorokrang dondikgija mikka waani a•sel Bristibar walo a•arang be•rurue rama sorokrango be•dape songni manderang mongsongbate skul re•gipa chatro chatrirang skul re•na aro porikka sena man•jae namen neng•nikaniko man•tokenga ine u•iataha.
Garoland State Movement Committee (GSMC) HQ, Tura-ni Additional General Secretary Bostone M.Sangma-ni u•iatani gitade, bang•a chatro chatrirang porikkani somoio neng•nikaniko man•ne porikka sena man•jaha.
Antigimik mikka waani a•sel chiring chibisikrang dal•bae bang•a biaprango chi bana re•e, nok-jamrang chio sripako man•aha, bang•a matchurang siaha, garirangko man•pakangaha aro a•arang rudape bol wa•arang ramarangko be•dape champengatako man•aha ine Bostone Sangma u•iataha.
Ia obostarangni bidingo ta•rake nirok sandianiko dakenba duko ga•akenggipa manderangna dakchakaniko on•na aro champengatako man•gipa rama sorokrangko taripile on•china District Administration aro BDO-rangko GSMC mol•molataha.