Williamnagar, June 1, 2022: East Garo Hills a•jani NGO-rang FKJGP, AHAM aro Mothers’ Union Sombar salo East Garo Hills a•jani Suprentindent of Pulis (SP)-na lekka sedoatenba, WGH a•jani Womens’ Pulis Station-o May jani 6 tariko badi ka•gipako nipiltaie sing•sandianiko dakchina dabiangaha.
NGO-rangni janapatani gitade, May jani 3 tariko me•chik saksa gari a•sel ong•anio janggitangko gimaatahani gimin sianggipa nokdangni manderang May jani 6 tariko WGH a•jani Womens Pulis Station-ona re•ange sianggipa me•chikko rim•sruke ra•angenba til•ekdra•e so•otaha ine badi ka•aha. Indiba Womens Pulisrang ia badi ka•ani bidingo maming ja•kuko de•kuja.
Gari a•sel ong•anio sianggipa nokdangni manderang East Garo Hills a•jani ning•o donggipa Rengregre songoni ong•achim. Ua nokdangni manderang WGH a•jani Womens Pulis Station-o badi ka•aniko pulisrang ramao a•sel ong•a ine agane maming ja•kukoba de•kuja ine u•iataha.
“Sianggipa nokdangni manderangni u•iatani gitade, sianggipa me•chikko Waiting R Sangma aro uni ripeng sakgni jemangan pulis ong•achim, uamang sriksrik rim•sruke ra•anggenba til•ekdraani ja•mano so•ote galaha. Uamang Bolero gari
ML-07B-9610-ko jakkale a•sel ong•aha. Dos dakgipa manderangni kosako pulis dolrang maming ja•ku de•aniko dakuja, indaken dosi gnanggipa manderang maming kenani gri rorame rona gita man•enga. A•sel ong•aniko naljokatna aro namgijaoniko warachaknagipa pulis dolrangan indake ong•sigipa kamko ka•genchimode, manderanga sano ka•donggen ? Duko ga•akenggipa nokdangni manderangna kakket bichalko ra•bachongmotna nanga. Nokdangni ma•a paa an•tangni ka•sabegipa demechikko gimaataha. Uamangni duk mikchirangko niate dos dakgipa manderangko rim•enba pattoko donna nanga. Sianggipana aro uni nokdangni manderangna kakket bichalko ra•bachongmotna nanga” ine East Garo Hills-ni NGO-rang dabiangaha.