Tura, May 29, 2022: A•chik a•songo songdong a•chaenggipa A•chik jatni dakbewal rikbewal, ganding chinding, doka dam•ani aro uandake bang•a kamrangna mingsing minggamako man•a.
Uandake A•chik jatni doka dam•aniko tarina changgipa sapgiparangoni saksa Pa Dewal M. Sangma, West Garo Hills a•jani Rombagre songo dongengachim, jatni rokkomanti doka dam•anirangko tarienga ine koborna parakataha.
Dewal M. Sangma A•chik jatni rokkomanti doka dam•anirang jekai “Dama” “Bangsi” “Nagra” “Dotrong” “Dimchrang” “Chigring” “Adil” “Sarenda” aro gipin gipin bosturangko tariasan ong•aija uarangko knatogipa sulona doknaba changa.
Bang•a doka dam•anirangko (Music honours) dakenggipa chadamberang uni changa sapaniko skie
ra•pana re•angronga. Ua Rombagre songo an•tangni Nok A•chik koba rikke donenga, jeon ua Traditional Music Skul aro Workshop-koba ong•atjolenga. Ua Garo Hills a•jao songdong a•chaenggipa bang•a manderangna doka dam•ani bosturangko tarie on•ronga.
Ua Meghalaya sorkarini gita ong•atgipa bang•a program-rango bakko ra•e an•tangni changa sapaniko jinmana parakronga. Ua A•chik jatni doka dam•aniko gimaatjachina, uni Music Skulo bang•a chatro chatrirangna skie on•enga ine koborna parakataha.