ADE Baghmara Unit Tura SP-ni kamko jegalatenba ta•rake kam ra•jitangchina dabia 

Baghmara, May 28, 2022: Association for Democracy and Empowerment (ADE) Baghmara Unit, re•anggipa May 26 tarikni walo Tura-ni NGO dilgiparangko Tura SP-ni kragija dagrange Tura Main Thana-ona rimange neng•nikataniko raken jegalataha.

Indake A•chik jatni kosako aro NGO dilgiparangni kosako SP ong•gija kam ka•ani gimin, ADE Baghmara Unit, West Garo Hills a•jani SP-ni kosako jegalatenba, West Garo Hills a•jani SP Vivekanand Singh Rathore-ko ta•rake Tura-oniko ba Garo Hills-oniko gipin biapchi kam ra•jitangchina ADE Baghmara Unit dabiangaha.

“Chingna indakgipa

SP gangboko, A•chik a•songo aro Garo Hills-ni je biapoba uko donna nangja, Garo Hills-o niam gri badingsrukgiparangko champengatani pal batesa, niamni kosako kam ka•enggipa manderangna chakpangpile kam ka•aniara, SP an•tangba niam gri badingsrukanio jak dongna nanga aro man•gnirangko man•pana nanga. Uni giminsa A•chik jatko mikchepe ra•enga. Chingna namgipa aro A•chik jatna ka•sae kam ka•gipa pulis officer-kosa nanga. A•chik jatko onchepgipa aro chonnike kal•stekgipa SP-ko ra•chakna man•jawa. NGO-rangni jattangna kam ka•aniko ja•donggaatna kam ka•gipa SP-ko aro gipin pulis officer-rangko Garo Hills-o nangtektekja, uamangko ta•raken kam ra•jitangna nangchongmota” ine ADE Baghmara Unit-ni General Secretary Tigana Sangma parakataha.

Garo Hills-o indakgipa Officer-ko donani a•sel A•chik A•songna namgijako ra•baenga. Uni gimin Vivekanand Singh Rathore gita dakgipa SP-ko nangjawa ta•rake kam ra•jitangna nangchongmota ineba Tigana Sangma janapataha.