Shillong, May 27, 2022: Meghalaya-ni Skotong Minister Conrad Sangma Bristibar salo sima arini bidingo gnigipa changna Assam a•dokni Skotong Minister Himanta Biswa Sarma baksa chanchirimaniko dakanggen ine parakataha.
“Chinga bang•a obostarangko nirok sandina nangani a•selo somoirangko sualgrike niaton jakchakja aro chol ong•ja, unbaksana Assam a•doko eleksin-rang sepangbaengjok. Eleksin-rang matchotani ja•mano, chinga Assam-ni Skotong Minister Himanta Biswa Sarma baksa sima arini bidingo agangolpogrikaniko dakanggen. Batanggimin salrango Assam pulisrang West Khasi Hills a•jaona re•ange Mallang Salbari songni manderangko ka•mikennate donangan baksana doke satte donangani bidingo Assam-ni Skotong Minister baksa agangolpogrikaha” ine Conrad Sangma parakataha.
Batanggimin salrango Mallang Salbari songo ong•anggipa obostani bidingo Assam-ni Skotong Minister baksa agangolpogrikaha aro Assam a•dokni SP-rangko indakgipa kamrangko niroksandie mikkangchi indakgipa gualanirangko daktaijachina didiataha.
Unbaksana sima arini bidingo bon•kamgipa chanchianiona sokbaja dipet ua songrangona re•ange songni manderangko ka•mikkenate rona man•jawa ineba Conrad Sangma koborna parakataha.