Tura, May 17, 2022:Garo Hills-ni nangrimgimin NGO-rang jekai ADE Apex Cimmittee Tura, FKJGP-GHZ, AYWO-CEC aro FAF-CEC re•anggipa March 29 tariko Meghalaya aro Assam-ni Skotong Minister sakgni Memorandum of Understanding (MoU)-o soi ka•e, Meghalaya-ni adita dam A•chik songrangko Assam-chi chapatahani gimin jegale so•sojengjeng ong•ani bidingo rakbate ja•kurangko de•angna gita Sombar salo Shillong songjinmaona re•ange, Khasi Hills-ni NGO-rang KSU, FKJGP-CEC, RBYF aro HNYF-ni dilgiparang baksa apsan tom•e chanchirimaniko dakangaha.
Khasi Hills aro Garo Hills-ni NGO-rang apsan asonge chanchirimaniko dakanio sima ario dongenggipa pilak A•chik songni manderangni neng•nikanirangko, duk ong•aniko aro grape donganiko chel•chakna Khasi Hills-ni NGO dilgiparang Garo Hills-ni NGO-rang baksa apsan ku•monge dakgrikanggen ine ku•rachakataha.
Indake NGO-rang tom•e chanchirimanio dingtang dingtang ja•kurangko de•angna chanchiangaha. Indiba skanggipa A•chik a•songo ba Garo Hills-o jingjengataniko dake Meghalaya-ni A•chik songrangko gipin a•dokchi watataniko namnikja ine jegalaniko dakna chanchiangaha. Uni gimin, NGO-rangni pilak re•mikkange ja•ku de•anirango sakanti A•chik a•songo songdongenggipa manderangni jak on•paniko nangnikenga ine ADE HQ-ni President, Dalseng Bira Ch. Momin, FKJGP-GHZ-ni President Pritam Arengh, AYWO-CEC-ni President Sengbath Ch.Marak aro FAF-HQ Tura-ni President Brinbal M.Sangma parakataha.
“Da•alo an•ching pilakan sima ario dongenggipa A•chikrangni grapaniko, duk ong•aniko aro neng•nikaniko pilakan nika. Uni gimin A•chik sakantiko indake mol•molna sika, na•a aro anga A•chik jat ine chanchiode, hai A•chik jatna dakgrikanio jak on•pabo ine mol•molna gita sikenga. An•ching A•chik jat gimik ku•mongode, an•chingni A•chik songko inchsaba gipin a•dokchi ra•angna gita man•jawa. Inchsaba A•chik jatni A•kingko gimana gita nangjawa. An•chik jat skangoni ku•monganirang komianio ba olgrokanio an•ching jatni dal•begipa A•kingrangko gimaataha. Indiba da•alo hai an•chingni chasongo inchsaba gipin a•dokna pale cha•na on•jana ine Dalseng Ch.Momin A•chik jat sakantiko mol•molataha.