Tura, May 16, 2022: South Garo Hills a•jani Gasuapara Pulis Station-ni ning•o donggipa Panchimgre songo bilsi 32 ong•gipa Grenalson B.Marak-ko nokdangni manderang aro mahari ma•drangrang apsan ku•monge, darangnaba u•iatgija bilsi 8-na bolo ja•tong tek•e dingmancha nok ge•sao chipchange donako pulisrang jokatani ja•mano n•sengpilaha ine kobor man•aha.
Indake ka•saninggijagipa manderang A•chik a•songo dongkuenga, ian aiao inmanpilani kam ong•a. Darangba Grenalson Marak-ko indake sasti on•ne dinengako ma•sijachim, indiba ua songchi bia cha•na re•anggipa manderang nike vedio ka•enba gimikchina watpripraako niksoe Siuth Garo Hills a•jani social activist saksa pulisna kobor on•atani ja•mano Dimapara ICP pulisrang sandiange Grenalson Marak-ko re•anggipa February 28 tariko jokataha aro uko bakan Baghmara Civil Hospital-ona ra•ange, Psychiatric ward-o sana bananiko dakaha.
Grenalson Marak gisik aro be•enni gita saknaako man•aha aro ka•sinesa ku•sik aganna man•aiahachim, indiba ua da•o an•sengpilaniko man•aha aro hospital-oni jokaha ine kobor man•aha.
Je nokdangni manderangan Grenalson Marak-ko ka•saninggija sasti on•ahachim, uamangni kosako Gasuapara Pulis Station-o mamlako segataha aro niam gita ja•ku de•aniko dakgen ine parakatahachim.