Mikka bang•e waani a•sel Ruga jolo ramarang nosto ong•e re•a doanio neng•nikaniko man•enga

Baghmara, May 13, 2022: South Garo Hills a•jani ning•o donggipa Doldoma (Ruga) jolni ramarang mikka bang•e waani a•sel namen namsrangjae salantio re•ruraengipa songni manderang, skul chatro chatrirang aro skulo skigiparang neng•nikaniko man•enga ine Ruga Area-ni Chadambe (Youth) dilgipa, Kalsrang Marak koborna u•iataha.

Salantion Skulni skigiparang rama namgijako re•rurana man•jae walpilna nangao ga•akenga. Indake rama namgijako batangimin somoirangonin badi (complaint) ka•ahachim, indiba sorkari aro authority-rang maming ja•ku de•aniko dakjaha aro skoba sajaha.

Indakgipa neng•nikani somoio manderangna dangdike on•na manderangni seoke watatgipa MLA, MDC-rangba maming nirokatani dongja uni gimin, uamango mikangchi maming ka•dongani dongja ineba u•iataha.

Dildoma Ruga jolni ramarang namsrangjani gimin salantio re•ruragipa manderang neng•nikaniko man•tokenga. Uni gimin, Ruga jolni chadamberang an•tangtang bilchi kam ka•aniko noksao nikna gita man•enga.

Batanggimin 2019 bilsirangonin ia ramako matchote kam ka•e on•china PMGSY-na tender on•manaha aro ia kamko Meehan Infratech Company contract ra•e kam matchotgija galchipe donaha ineba u•iataha.