Baghmara, May 12, 2022: South Garo Hills a•jani ning•o donggipa Rugapara songni PMGSY ramako ja 18-o matchotna nanggipa kamko bilsi 4 ong•piloba matchotchipja ine GSU Ruga Regional Unit matnangataha.
GSU Ruga Regional Unit-ni General Secretary, Best Well D. Marak-ni janapatani gitade, Ruga-oni Chokpot-ona dakanggipa PMGSY ramako nirokgpa contractor ia ramani obostako mikron nikjama ineba sing•doataha.
Ia ramako motor bike-rang aro chongipa garirang salnan man•gija, namen kosto ong•enga. Ja•achi re•gipa manderang sendal, juta okesa re•na gita nangenga ine u•iataha.
Ia PMGSY ramako nirok simsakgija donani a•sel songni manderangna namen neng•nikaniko on•enga. Ia ramako sawa mai dakgipa contractor-na authority-rang kam on•aha, changsaba nirok simsaka dongja ine janapataha.
Iandakgipa songni PMGSY ramako nirok simsake on•na sikjaode contract-ba ra•na nangja. Ia ramako contract man•gipa ge•sa kamkoba chu•sokate on•a dongja ine GSU janapataha.
“Chingni A•chik a•song Ruga-Chibok a•jako silroro namroroatna, nirok simsakchina seoke watatgipa dilgparanga ia ramako nirokna nangachim. Chinga ia ramako salanti re•ruraanio namen neng•nikaniko man•a. Chingni seoke watatgipa dilgiparang manderangni namgnina chanchie ia ramako nirokpaode namachim” ine GSU Ruga Regional Unit-ni Publicity Secretary Nikchong N Sangma janapatskaha.