Williamnagar, May 8, 2022:Niksamso A•chik Society (NAS) Garo Community Organisation, Garo Hills-oniko niam gri aro maming permit gri bol wa•arangko gipin a•dokchi ra•ange palsrukataniko raken champengataha.
Gipin jatrang Garo Hills-o nape niamni a•palo bol wa•arangko cha•ue walo salangako Forest Department name nirokjaenga ine matnangatenba, mikkangchi rorirangni niam gri Garo Hills-ni bolrangko cha•ue salanganiko mamedake nirok sandianiko dakchina NAS didiataha.
A•chik a•songo bol wa•arang komianichi chiring chibisikrang tiproroangenga, uarangko simsakna sakantini daito ba jako ong•a. A•chik a•songni Samtangtango ong•telaigipa buring bolgrimrangko aro bol wa•arangko nosto ka•e galjachina NAS sakantikon didiataha.
Uni gimin jemangan niam gri Garo Hills-ni bol wa•arangko gipin a•dokchina cha•ue watatengachim, uamangni kosako raka ja•kuko de•anggen ine NAS-ni President Tengrak Marak parakataha.
A•chik a•songo ong•telaigipa an•chingni samtangtango dongenggipa Environment-ko simsakna nangchongmotenga aro uarangko gimaatgija ripingna A•chik a•songni sakantian ja•ku de•na nanga. Jedakode, A•chik a•song nitogipa, rona rotogipa aro ka•singipa a•dok ong•china.
Uni gisepon champengataniko manigija bol wa•arangko skatang den•ne galode ba cha•ue gipin biaprangchi watataniko rim•a man•ode, sastiko on•a baksana Court-ona sokatgen ine NAS mikkrakatangaha.