Tura, April 18, 2022:North Garo Hills a•jao gnigipa a•sel ong•e, Easter Monday-ni salo mande saksa siaha ine kobor man•soaha.
Ia a•selara North Garo Hills a•jao donggipa Chichra Manda Chibima, Rongchong Wageasi-o bilsi 25 mangna batgipa Senja D.Shira, chiona bilonange siaha, ua Damas Chutikona songoni ong•achim.North Garo Hills a•jani pulisrang a•sel ong•aniko kobor man•soe attam 2 bajio a•sel ong•gipa biapona re•angaha. Indiba sigimin mandeni manggisiko saldosoaha ine u•iataha.
Ia a•sel ong•aniko mikrontangchi nikgipa manderangni u•iata gitade, Senja Shira chiona bilonangaoni nadobapiljaha. Ian East Garo Hills a•jani Samanda Rongkem, Simsang Chibimao pante saksa gimaani ja•mano gnigipa a•sel North Garo Hills a•jani Manda Chibima, Rongchong Wageasi-o ong•skaha.
Iandakgipa a•selrang ong•ani gimin, chibima rikamrangoni an•tangtangko naljoke aro simsake dongchina pulisrang didiataha.
Iasan ong•aigija, Garo Hills-ni dingtang dingtang biaprango picnic cha•na re•anggipa manderang Easter Monday-o a•sel ong•anirangko kobor man•soaha. Kobor man•soani gitade South Garo Hills a•jani Emangre Fish Santuary-o a•sel ong•e, Eringgre songni John Clistzer Marak gimaenga ineba kobor man•aha.
Una agreba Easter Monday-ni salo dingtang dingtang biaprango bang•a garirang a•sel ong•e manderang saknaaniko man•tokaha. Indake ong•engon, East Garo Hills a•jani Rongjeng Darugre-o car baksa motor bike chatinggrikaha, indiba rasong gnangbee janggi jokaha. Apsandake East Garo Hills-ni Dobu jolo autoricksaw bolsa sorok ka•machi ga•akonangaha, indiba manderang rasong gnange jokaha. Unbaksana West Garo Hills-ni Jengjal Watregre-o car bolsa sorok ka•machi romtomange a•sel ong•aha.
Indakgipa obostarang Easter Monday-ni salo picnic cha•na re•ange a•sel ong•tokaha.