Baghmara, March 26, 2022: Koila bikotgipa bang•a songrangon a•ani bil, a•ani gamchatani aro a•ani ran•chretani ara a•a-o koilako danani a•sel ba koila a•koloni ong•katgipa bisi gnanggipa chi chibima aro chiringrang ona brine jokchapani a•sel ong•a. Mande-matburing oni buring-bolgrim ona, chio pangchakgipa janggi gnanggipa pilak jonturang chiko jakalanichi dingtang dingtang sabisirangko man•a ine sing•sandianichi u•iatnagita man•aha. Mitam bi•aprang jekai Nongkhyllam, sohra aro Jaintia Hillsni dingtang dingtang songrango a•brirangni a•gisi pil•ani, chiringrangni rong dingtangani aro na•tokrangni gimaani ara niam gri koilarangko bikotani a•sel ong•a. Apsan daken Garo Hills-oba koilarangko bikotanichi dingtang dingtang bi•aprango a•bri aro chiringrangni nom•bokako ba dingtanganiko nikna gita man•baroroengaha.
South Garo Hills a•jani ning•o donggipa Chokpot jolo niam gri koilarangko bikotanichi wilwilao donggipa songni manderang salantio nangana jakkalenggipa chiring chibisikrang nosto ong•atako man•enga ine A•chik Association for Protection of Environment (AAPE) parakataha.
Koborna parakatani gitade, Kakija Chiringara A•king Gopgre-ni ning•o donggipa Rongma Kakija, Kilborma, Paromgre, Damalgre aro bang•a songrangko napake Dareng chibimaona jokbagipa chiring ong•a. Ia chiringko adita songrang jekai Dagal Gopgre, Damalgre, Dagal Songgitalgre, aro gipin dam 27 songrangni manderang salantio nanga kamna jakkalenga ineba u•iataha.
Uamangni jakkalenggipa chini rong dingtanganiko nike uarang maini a•sel indake ong•enga, uko ma•sina sing•sandianiko dakon uamang niam gri koila bikotenggipa a•damko nikaha.
“Adita jarangna a•jao niamni kosako re•e koila bikotaniko nikna gita man•aha, uamang sorkarini mikkangkon re•pake koila garirangko sale bading chiwalenga. Je authority-ni manderang indakgipa kamrangko nirok sandiachim uamang bang•a changon indakgipa kamrangko nikja dake, niamni kosako re•e kamko ka•enggipa manderangko badi ka•na didiata. Ia obostani bidingo seng•gnang ma•sigenchim ong•ode, rake ja•ku de•e chiring chibisikrangni nosto ong•aniko champengna man•genchim” ine AAPE janapataha.
Songni manderang ia chiringon ka•donge janggi tangenga aro uamang Public Health Engineering Department (PHE)-ni gita sale on•gipa chirangko man•kuja. Ia obostarangni bidingo State Pollution Control Board (SPCB), Department of Mining and Geology ( DMG) aro uandakgipa bang•a Department-ni manderang a•dokni buring bolgrimrangni bon•anganiko aro chiring chibisikrangni nosto ong•anganiko champengna nirok sandina nangchongmota ineba AAPE janapataha.