Tura, May 20, 2022: Re•anggipa May 15 tarik Robibar salo All Garo Hills Merchants’ Association (AGHMA), Skotong Minister Conrad K.Sangma-ko gronge Garo Hills-ni dingtang dingtang biaprango donggipa bajar antirangko cha•enggipa gipin jatrangko TNT check ka•na aro Garo Hills-o a•paloni manderang re•roroe songo noko nape bading chiwalgiparang, bosturangko ra•roroe palbadinggiparangko champengna nanga GHADC-ni Deputy CEM aro Taxation-ni EM in-charge Nikman Ch. Marak-na on•gipa apsan memorandum-ko Skotong Minister Conrad Sangma-na on•aha.
Garo Hills-ona a•palchini re•bagipa gipin jatrang skatang re•roroe bading chiwalanichi songo noko napsrukanichi Garo Hills-ni manderang bading chiwale cha•anio cholina gita man•jaenga ine janapataha.
AGHMA-ni miksonganian a•songtangni manderang a•songtangon bading chiwale cholichina nanga, uni gimin Garo Hills-o a•palni manderang skatang nappruprue bading chiwalaniko champengna ja•ku de•ani ong•a. Gipin jatrang maming ge•etani gri Garo Hills-o skatang nape bading chiwalgiparang Garo Hills-na ong•sianiko ba kangal ong•aniko ra•baengani a•sel Garo Hills-ni manderang bading chiwalanio choligipa ong•na man•jaenga. Uamang bolam biterangko bading chiwalna re•baa dake Garo Hills-o songdongkamna cholko ra•enga, uni gimin man•a dipet a•paloni bading chiwalna pa•sike re•bagiparang gimikkon champenganggen ine AHGMA-ni President Thoseng Cheba Sangma janapataha.
AGHMA-ni Skotong Minister-na seatgipa apsan memorandum-ko Tura-ni BJP MDC aro Meghalaya a•dokni BJP Vice President, Bernad N.Marak-naba on•angaha. Una agreba ia apsan memorandum-kon Garo Hills gimikni Pulis Station, Bajar Committee , Nokma, songni nokni dilgiparangna sokatgen ineba parakataha.
“Chinga gipin jatrangni bading chiwalaniko dontongata ong•ja, indiba jerangan Garo Hills-o bading chiwale cha•paengachim, uamangba an•ching Garo Hills-ni dongimin niamko ja•rike bading chiwalchina, Uamang TNT tarie bajarrango palchina aro bajaro bolam biterangko brechina. Antio changsa bajar cha•giparangona sal nabana skang re•bajachina aro Garo Hills-ni bajaroni sal napna skang re•angpilchina.
Jedake skang gita an•ching bajarchi ole kie palachim, uandaken da•oba bajarchi ole kie palna Garo Hills-o songdonggipa ma•a paarang, jong adarangko ku•mongatpaenga.
Da•ode skang gita koko ole kie bajarchi ra•angna nangjawaha. Songantion gari gora dongaha, rama jal•angrangba skang gitade ong•jaha. Maina songo noko nape bolam biterangko ra•anichi bang•a Garo Hills-na kangal cha•asianiko ra•baenga, jedake saniba jikko kal•aka, saniba demechikko rime katanga, saoba sina bon•na nangenga, banoba bagan bari palaniko tangka paisa man•jaenga.
Indake dakani a•sel, Garo Hills-ni manderang je jatba bading chiwale cha•anio cholina gita man•jaenga. AGHMA uarangko chanchiritkote kam ka•na re•chakatengaha. Ia kamko ka•anio AGHMA-ni membor-rangsan ka•aijawa, Garo Hills-o donggipa pilakan kam ka•na jak on•pae chakpaaniko on•na nanggen.
An•ching chasongo maiko dake cha•gen, lekka pora dongoba gimiknade sorkariba kamko tikatjaenga. An•chingni a•song Garo Hills-o bading chiwale, game ge•e cha•na namgipa biap ong•a, ia biapko sawa dokol ka•na tarienga, ja•mano mai ong•gen uarangko chanchisoe ja•ku de•na nangengaha. An•ching a•songtangon bading chiwale cha•oba cholijaode bano maidake choligen. Uko aganengon saoba sastroni katta Phil 3:20-ko janape an•chingni songpanganide Salgiosa A•gilsakode an•chingara pilakan songdongkamjawa tangka paisade gam jinrangde ong•gramia ine agana donga. Indiba uko ui•na ja•manchaknabe, okriode ok rim•tatari Isolko olakina gong•jawa. Nang•o tangka dongjaode dantula on•na dongjawa, nang•o gam dongjaode Mondoli-ko rikna man•jawa. Nokdango aro a•songo tom•tomjaode, Isolko olakina man•jawa. uni gimin an•ching mande pilakan dikdiksa A•gilsako songrena re•bapaoba kusi ong•e Isolko olakie songdongpana gita tarina nangchongmota. Maina salgichi re•naba kam ka•mitingode cha•aniko nangaia cha•esa kam ka•gen.
A•gilsako maidakode discipline gnang tom•tome nitoe dongna man•gen, indaken Isolni namgipa gisikko on•anichi niamrangko dakaha..jedake Indian Constitution-ko Dr BR Ambekher-maang pilak jat baksa melie dongna nanga, je torom ba ma•malrang jakgittel ong•e olakina man•na gita dingtangtang niamrangko dakaha. Apsandake an•ching Garo Hills-oba, jerangan gipin jatrang Garo Hills-o badingchiwalengachim, TNT tarina nanga. Ia niamrangko dakna nangchongmota ine AGHMA a•songko jatko dilgiparangna bil gnanggiparangna janapenga. Sastro-ni bako 1 Johan 3:4 Papko ka•gipa sakantian niamkoba pe•a aro niamko pe•an pap ong•a ine janapa gnang. A•songko jatko nitoatna silatna tom•tomgipa ong•nade niamkoba ja•rikna nanga. Gipin a•songo songdonggipa an•ching Garo-rang, gipin a•songni niamrangko ja•rike bama gnang, kending kengding dake dongpaenga. Uandakde Garo Hills-o songdonggipa gipin jatrangba Garo Hills-ni niam rettirangko ja•rike songdongpana nanga” ine AGHMA janapataha.