Goalpara, May 15, 2022: Assam a•dokni Goalpara a•jao donggipa Mornai Pulis Station (PS)-ni ning•o Rakhyasini songni Jambot Sangma-ni bariko Muslimrang Rongjan Ali-ni dakdilachi ra•sekdrana jotton ka•aha ine AHAM, Assam State Zone (ASZ) Rajapara Regional Unit-ni Predident Raksim Marak parakataha.
Ia obosta re•anggipa May 13 tarik Sukrobar salo Rongjan Ali-ni manderang Jambot Sangma-ni bariona napdrae, bari nokgipana mamingkoba agangija guerang den•gale nok rikna a•bachengaha. Ua manderangni skatang guerangko den•ani gimin bari nokgipa re•bae beng•ahaon, denggu manderang bari nokgipako sepangona re•bana ong•gija noko nape dongchina ge•etaha, aganako manijaode, stonggen ine ka•mikkenatpangpilaha ine u•iataha.
Ia obosta ong•ani ja•mano bari nokgipa pulisna kobor on•ataha, indake pulisrang re•bahaon, Rongjan Ali-ni manderang biapko wate katangaha. Ia a•selni bidingo Marnai PS-o badi ka•e mamlako segataha ineba u•iataha.
Indiba ua manderangko da•onaba rim•kuja ine parakatenba a•sel ong•gipa bipaona AJAM-ASZ-ni dilgiparang Sonibar salo re•ange bari nokgipako grongeaha aro Goalpara a•jani DC-na lekka sedoate, chel•chakgipa pulis dolko on•china AHAM mol•molataha.
Raksim Marak-ni u•iatani gitade, ia a•selni bidingo press conference-koba ong•ate agantalataniko on•angjolaha ine u•iataha.
“Ia Raikosi songo chengonin A•chikrangni song ong•a. Chengode Goalpara-ni wilwilao maming kajia golmal dongja, kumong nangrime donfachim. Unbaksana Chinga skangonin a•ani kajinarangko gambaenga aro iarangni record 1915 bilsionin donga” ine songni budepa saksa agan taldapataha.