Shillong, March 21, 2023: Voice of the People’s Party (VPP) dolni MLA-ni skanggipa Budget Session-ni salo Governor Phagu Chauhan-ni Hindi ku•sikchi Assembly-o agananiko jegale ong•katgrime kataha ine u•iataha..
Governor Phagu Chauhan Hindi ku•sikchi agana a•bachengani dikdiksa ja•man VPP MLA Ardent Milker Basaiawmoit jegalna a•bachengaha. Governor jinmani ma•sigipa aro agana man•gipa ku•sikkosa Assembly-o jakkalna nanga ine jegalangaha.
Uni gisepon Assembly Speaker Thomas A Sangma, uko beng•e ra•an baksana chokkitango tom•tom asongchina didiahachim, indiba uamang knachakjaha.
Arden Basaiawmoit Assembly House-ni niam nombor 20-ko jinmana aganprakenba English ku•sikkosa jakkalna nanga ine aganaha.
“Anga Governor-na Speaker-ni jakchi u•iataniko on•na nangnika, Meghalaya a•dok Hindi ku•sikko agangipa a•dok ong•ja. Skang chengo Assam a•dok baksa bakrimiting somoio uamang Assamese ku•sikkosa official ku•sik ine ra•gatna miksongani giminsa an•ching dingtang a•dokko dabie cheaha. Uni gimin da•o Assembly House-oba an•chingni jakkalgijagipa ku•sikko ra•nappajachina mol•molna sika” ine ua aganaha.
Uasan ong•aigija, a•songni 8-gipa Schedule-oba,ua Garo aro Khasi ku•sikko ra•napna nanga ine dabiangaha.
“Ma•mong sorkari Meghalaya a•dokni Garo aro Khasi ku•sikko 8-gipa Schedule-o ra•gatna jechakronga. Uni gimin Governor ba chingni ma•sigipa aro agana man•gipa ku•sikkosa jakkalna nangskaa” ineba ua agandapataha.
A•dokni Skotong Minister Conrad Sangma, Governor-ni Hindi-chi aganprakenggipa kattarangko English-chi pe•skagipa lekkako Assembly-ni pilak member-rangni mikkangon donaha, Hindi-ko ma•sijagenchimode, English-chi pe•skagipa lekkako nie ra•skana man•gen ine aganaha.
“Mande ong•e English-ko poraina man•jagenchimode, an•ching uko maming dakeba drana man•ja. Governor-ni Hindi ku•sikchi poraienggipa kattarangko English-chi pe•aha, jekon member sakprakna sualaha. Ua an•tang Hindi-chi poraina sike poraia ong•ja, indiba English ku•sikko poraina man•jani a•selsa Hindi-chi poraiskaha. Governor-ko indake mande ra•gijaniko nike anga blongen duk ong•a” ine Conrad Sangma aganaha.
Indake Governor-ni Hindi-chi aganprakengon, VPP dolni MLA-rang Down! Down! ine chrikenba Assembly House-oni ong•kate katokaha ineba u•iataha.