Tura, April 6, 2023: Garo Hills-o skanggipa changna Butbar salo, ‘Aman A•song Millet Festival’-ko Tura Orchid Hotel Polo-o ong•atangaha. Ia Festival-ko North East Slow Food aro Agrobiodiversity Society (NESFAS) baksa song dam 23-ni maanderang bakrime ong•ataha.
Garo Hills-o gimaangenggipa ge•a gamani bichilrangko man•piltaina NESFAS rakbee kamrangko ka•anichi misi bitchil aro gipinrangko bang•en man•piltaiengaha ine NESFAS-ni Senior Associate Tra Rimchi N.Marak aganaha.
Ia Aman A•song Millet Festival-ko maniaona, Dadenggre Sub Division-ni Civil SDO Abhishek Gowda mongsonggipa sokgipa ong•e bakko ra•angaha. Unbaksana, dingtang dingtang sorkari deparment-rang, College of Community Science, Meghalaya Basin Development Agency, Mission Organic Value Chain Development for Northeast Region (MOVCDNER), ATMA-ni Official-rang aro songni game-ge·e cha·enggipa manderang, Project-ni bak ong·gijagipa songni Nokmarang, bang·a dingtang dingtang songni manderang bakko ra·angtokaha.
United Nations, ia 2023 bilsiko International Year of Millet ba misirangni bilsi ine parakataha, misi aro gipin gimaangenggipa bitchilrangko man•piltaina NESFAS dingtangmancha jako ra·e kamko ka·enga. Uandake, Agroclecology Learning Circle (ALC) Project-ni ning·o, jatni dakrongbewalko jakkale misirangko ge•a gamanio nangchapgipa jekai a·sal, mi-misirangko nisigipa jo·ongrangko nirok-simsakani aro uarangni gimin skie on•ani ba dake ka·e nianirango song dam 23-ni manderang bakko ra·angaha.
Ia festival-ona mongsonggipa ong·e sokgipa Dadenggre Sub Division-ni Civil SDO Abhishek Gowda, jinmana aganprakanio, mi-misirangko tangatpilna aro uarangko tang·doatna kamrangko ka·enggipa pilak game-ge·e cha·giparangko aro NESFAS-ko dingtangmancha de·mittelpilangaha, “Misirang mandeni be•en-na bang•a namgniko on•a, uaranga jekai iron, fibre, calcium aro iandakgipa mi-misirangni gimin chasongsa chasonggipinoni man·rikrikbagipa mi-misini rokommrangko tang·doatna kamrangko ka·na nangenga” ine Gowda aganangaha.
Uandake, mi-misirangni gamchataniko batanggipa bilsirango NESFAS-ni chu·sokgipa kamrangko Nutrition-ni Senior Associate Tra Rimchi N Marak, agan-talate on•angaha.
Indake festival-ni bon·kamao, bakrime kam ka•enhgipa dingtang dingtang songni manderangni tarie ra·bagipa cha·ani bosurang, buringni me•su samjakrang, misini rokomrang, bitchilrang, jaktangchi tarigipa bosturangko mesoke palgipa dokkanrangko Civil-SDO do•ga oprake on•angjolaha.